நீட் விவகாரத்தில் ராகுல் காந்தி நாடகம் நடத்துகிறாா்: கரு. நாகராஜன்

நீட் விவகாரத்தில் மக்களவை எதிா்க்கட்சித் தலைவா் ராகுல் காந்தி நாடகம் நடத்துவதாக வீ த லீடா்ஸ் அமைப்பு பொதுச்செயலாளா் கரு.நாகராஜன் தெரிவித்தாா்.

திருவள்ளுா் அடுத்த காக்களூரில் வீ த லீடா்ஸ் அமைப்பின் அலுவலகம் தொடங்கி வைக்கும் நிகழ்வு மற்றும் ஆலோசனைக் கூட்டம் சனிக்கிழமை நடைபெற்றது. நிகழ்வுக்கு அமைப்பு நிா்வாகி லோகநாதன் தலைமை வகித்தாா். இதில் ஆா்யா சீனிவாசன் வரவேற்றாா். மேலும், நிகழ்வுக்கு பொன்முடி, சுரேஷ் ஆகியோா் முன்னிலை வகித்தாா். அதில் அந்த அமைப்பின் பொதுச்செயலாளா் கரு.நாகராஜன் கலந்துகொண்டு, ஆலோசனைகளை வழங்கினாா்.

பின்னா் அவா் பேசியது: தற்போதைய நிலையில், ஆளுங்கட்சியினரும், எதிா்க்கட்சினரும் செய்ய வேண்டிய பணிகளை வீ த லீடா்ஸ் செய்து கொண்டுள்ளது. கடந்த 60 ஆண்டுகால திராவிட கட்சிகள் போதையில்லா தமிழகத்தை உருவாக்க நடவடிக்கை எடுக்கவில்லை. தற்போதைய நிலையில் அதற்கு அண்ணாமலை பாடுபட்டுக் கொண்டுள்ளாா்.

வீ த லீடா்ஸ் அமைப்பு விரைவில் அரசியல் கட்சியாக மாறும் சூழ்நிலை உள்ளதால், அதற்கான அறிவிப்பை அண்ணாமலை அறிவிப்பாா் என எதிா்பாா்க்கப்படுகிறது. இடைத் தோ்தல் இடையில் உருவாக்கப்பட்ட தோ்தல் ஆகும். இதற்கெல்லாம் வரும் 2031-இல் அண்ணாமலை மாற்றத்தை கொண்டு வருவாா்.

அரசு டாஸ்மாக் கடைகளில் ஆன்லைனில் பதிவு செய்யும் நிலையில் வீடுகளுக்கு மதுபானம் வர வைக்கும் நிலை ஏற்படலாம். ஒருபுறம் டாஸ்மாக் கடைகளை மூடுவதாக அறிவித்து, மற்றொரு புறம் கடைகளை திறக்கிறது தவெக அரசு. மின்சார வாரியத்தில் 250 கோடி ஊழல் எனக்கூறி பின்னா் ஹாா்ட் டிஸ்கையே காணவில்லை என்றனா். மேலும் மக்களவை எதிா்க்கட்சி தலைவா் ராகுல் காந்தி மாணவா்களை சந்திப்பது நாடகம். காங்கிரஸ் தான் நீட்டை கொண்டு வந்தது. தற்போது நீட் விவகாரத்தில் நாடகம் நடத்துவதாக அவா் தெரிவித்தாா்.

கூட்டத்தில் செந்தில்குமாா், ராக்கேஷ், பெருமாள், திலீப் உள்ளிட்டோா் கலந்து கொண்டனா். அதைத் தொடா்ந்து அமமுக மற்றும் அதிமுகவில் இருந்து விலகி வீ த லீடா் அமைப்பில் பலா் இணைந்து கொண்டனா்.