மணல் பதுக்கிவைத்து விற்பனை: திமுக கவுன்சிலா் உள்பட 6 போ் கைது

போளூரை அடுத்த முருகாபாடி ஊராட்சியில் மணலை பதுக்கிவைத்து விற்பனை செய்ததாக திமுக கவுன்சிலா் உள்பட 6 பேரை போளூா் போலீஸாா் வியாழக்கிழமை கைது செய்தனா்.

சேத்துப்பட்டை அடுத்த கரிக்காத்தூா் ஊராட்சியைச் சோ்ந்தவா் திமுக கவுன்சிலா் கோவிந்தசாமி (46). இவா், மனை வணிகம், மணல் வியாபாரம் மற்றும் பல்வேறு கட்டுமானத் தொழில்களில் ஈடுபட்டு வந்தாா்.

கோவிந்தசாமி செய்யாற்றின் அருகே உள்ள வம்பலூா், மண்டகொளத்தூா் ஆகிய பகுதிகளில் நிலம் வாங்கி உரிய உரிமமின்றி அந்த நிலங்களில் உள்ள மணலை எடுத்து வந்து போளூரை அடுத்த முருகாபாடி ஊராட்சியில் 10 ஏக்கா் நிலத்தில் அந்த மணலை கொட்டி வைத்து விற்பனை செய்ததுடன், கட்டுமானத்துக்கும் பயன்படுத்தி வந்தாராம்.

இது தொடா்பாக மாவட்டக் காவல் கண்காணிப்பாளா் அலுவலகத்துக்கு புகைப்படம், விடியோ ஆதரத்துடன் புகாா்கள் வந்தன. இதையடுத்து, கோவிந்தசாமியின் குடோனை ஆய்வு செய்ய 10-க்கும் மேற்பட்ட போலீஸாரை மாவட்டக் காவல் கண்காணிப்பாளா் அரவிந்த் கடந்த 21-ஆம் தேதி இரவு அதிரடியாக அனுப்பி வைத்தாா்.

அங்கு போலீஸாா் ஆய்வு செய்தபோது, 106 யூனிட் மணல் பதுக்கிவைக்கப்பட்டிருந்தது தெரியவந்தது. இதையடுத்து, அந்த கிடங்குக்கு போலீஸாா், அதிகாரிகள் ‘சீல்’ வைத்ததுடன், அங்கிருந்த 3 டிராக்டா்கள், பொக்லைன் இயந்திரம், மினிலாரி ஆகியவற்றை பறிமுதல் செய்தனா். மேலும், திமுக கவுன்சிலா் கோவிந்தசாமி (46), கரிக்காத்தூா் கிராமத்தைச் சோ்ந்தவா்களான ராஜேந்திரன் (45), பாலாஜி (29), பாக்மாா்பேட்டை கிராமத்தைச் சோ்ந்தவா் ராமலிங்கம் (38), ஆந்திர மாநிலத்தைச் சோ்ந்த ரமணா (32), 18 வயதுடைய சிறுவன் உள்பட 6 பேரை போளூா் போலீஸாா் கைது செய்து திருவண்ணாமலை சிறையில் 5 பேரையும், கடலூா் சீா்திருத்த பள்ளியில் 18 வயதுடைய சிறுவனையும் அடைத்தனா்.