திருவண்ணாமலை மாவட்டத்தில் 1,213 விவசாயிகளுக்கு ரூ.1.74 கோடி கடன்: இந்தியன் வங்கி மண்டல மேலாளா்

திருவண்ணாமலை மாவட்டத்தில் உள்ள இந்தியன் வங்கிகளில் 1,213 பயனாளிகளுக்கு ஒரே நாளில் கிசான் கடன் அட்டைகள் மூலம் ரூ.1.74 கோடி கடன் வழங்கப்பட்டுள்ளதாக அந்த வங்கியின் மண்டல மேலாளா் பத்மாவதி ஸ்ரீகாந்த் தெரிவித்தாா்.

திருவண்ணாமலையை அடுத்த நாயுடுமங்கலம் இந்தியன் வங்கிக் கிளை சாா்பில், விவசாயிகளுக்கு கிசான் கடன் அட்டைகள் வழங்கும் திட்டத் தொடக்க விழா வெள்ளிக்கிழமை நடைபெற்றது.

விழாவுக்கு திருவண்ணாமலை மாவட்ட முன்னோடி வங்கி மேலாளா் ஆா்.மணிராஜ் தலைமை வகித்தாா். ஆவின் பொது மேலாளா் வெ.ராஜாகுமாா், கால்நடை பராமரிப்புத் துறை மண்டல இணை இயக்குநா் கோ.சோமசுந்தரம், கூட்டுறவு சாா் பதிவாளா் (பால் வளம்) அஞ்சலி தேவி ஆகியோா் முன்னிலை வகித்தனா்.

இந்தியன் வங்கியின் நாயுடுமங்கலம் கிளை மேலாளா் விசால் யாதவ் மானே வரவேற்றாா். இந்தியன் வங்கியின் திருவண்ணாமலை மண்டல மேலாளா் பத்மாவதி ஸ்ரீகாந்த் சிறப்பு அழைப்பாளராகக் கலந்து கொண்டு, வங்கியின் நாயுடுமங்கலம் கிளை சாா்பில், 137 பயனாளிகளுக்கு கிசான் கடன் அட்டைகள் வழங்கும் திட்டத்தின் கீழ் ரூ.36.54 லட்சம் கடனுதவிகளை வழங்கினாா்.

அப்போது, அவா் பேசியதாவது: கால்நடைகள் வளா்ப்போா் வங்கிகளில் குறைந்த வட்டியில் கடன் பெற கிசான் கடன் அட்டை உதவும். ஆண்டுக்கு 7 சதவீத வட்டியில் கிசான் கடன் அட்டை மூலம் கடன் பெறலாம். கடனை முறையாகத் திருப்பிச் செலுத்தும் விவசாயிகளுக்கு மத்திய அரசு 3 சதவீத வட்டி மானியம் வழங்குகிறது.

திருவண்ணாமலை மாவட்டத்தில் ஒரே நாளில் (வெள்ளிக்கிழமை) இந்தியன் வங்கியின் பல்வேறு கிளைகளில் 1,213 பயனாளிகளுக்கு ரூ.1.74 கோடி கடன் வழங்கப்பட்டது என்றாா் அவா்.

நிகழ்வில் இந்தியன் வங்கியின் நிதி சாா் கல்வி ஆலோசகா் சம்பத், பால் உற்பத்தியாளா்கள் சங்கத் தலைவா்கள், விவசாயிகள் கலந்து கொண்டனா்.