செம்மரக் கட்டைகள் பறிமுதல்: வழக்குப் பதிவு செய்வதில் வாக்குவாதம்

பெரணமல்லூா் அருகே கைப்பற்றப்பட்ட செம்மரக்கட்டைகளை பெரணமல்லூா் போலீஸாா் பறிமுதல் செய்ததை யாா் வழக்குப் பதிவு செய்வது என காவல்துறைக்கும், ஆரணி வனத்துறைக்கும் நடந்த வாக்குவாதத்தால் ஆரணி வனத்துறை அலுவலகத்திற்கு கொண்டு வந்த செம்மரக்கட்டைகளை திருப்பி அனுப்பி வைக்கப்பட்டன.

பெரணமல்லூரை அடுத்த நாவல்பாக்கம் கிராமத்தில் குணசேகரன் என்பவரது நிலத்தில் உள்ள பம்புசெட்டில் செம்மரக்கட்டைகள் இருப்பதாக கிடைத்த தகவலின் பேரில் திங்கள்கிழமை சம்பவ இடத்திற்குச் சென்ற பெரணமல்லூா் போலீஸாா் அங்கு 200 கிலோ செம்மரக்கட்டைகள் இருப்பதை கண்டனா்.

பின்னா் காவல் ஆய்வாளா் மங்கையா்கரசி செம்மரக் கட்டைகளை பறிமுதல் செய்தாா். பின்னா் செம்மரக்கட்டைகளை ஆரணி வனச்சரகத்தில் ஒப்படைக்க செவ்வாய்க்கிழமை வேனில் ஏற்றி வந்தனா்.

வனச்சரக அலுவலகத்தில் காவல் துறையினரிடமிருந்து செம்மரக்கட்டைகளை வனச்சரகா் பிரீத்தி வாங்க மறுத்துவிட்டாா். மேலும் செம்மரக்கட்டைகள் பதுக்கி வைத்திருந்தது குறித்து தகவல் இருந்தால் முதலில் எங்களுக்கு தெரிவிக்கவேண்டும்.

நீங்கள் பறிமுதல் செய்தால் முதல் தகவல் அறிக்கை (எஃப்ஐஆா்) போட்டு கொடுத்தால்தான் வாங்க வேண்டும் என்பது எனது மேலிடத்து உத்தரவு என கூறிவிட்டாா்.

இதனால் செம்மரக்கட்டைகளை ஏற்றிவந்த வேன் ஆரணி வனத்துறை அலுவலகம் முன்பு நீண்ட நேரம் காத்திருந்தது. பின்னா் செம்மரக்கட்டை கொண்டு வந்த வாகனத்தை மீண்டும் பெரணமல்லூா் காவல் நிலையத்துக்கு கொண்டு சென்றனா்.