புளியந்தாங்கல் முத்தாலம்மனுக்கு  108 பால்குட அபிஷேகம்

ராணிப்பேட்டையை அடுத்த புளியந்தாங்கல் முத்தாலம்மன் கோயிலில் அம்மனுக்கு 108  பால் குடங்களில் அபிஷேகம் செய்யப்பட்டது.
ராணிப்பேட்டையை அடுத்த புளியந்தாங்கல் கிராமத்தில் உள்ள முத்தாலம்மன் கோயில் 12-ஆம் ஆண்டு ஆடித் திருவிழா ஞாயிற்றுக்கிழமை வெகுவிமரிசையாக நடைபெற்றது.
இதையொட்டி, காலை 6 மணியளவில் கணபதி ஹோமம், லட்சுமி ஹோமம், கலச பூஜையுடன் திருவிழா தொடங்கியது. தொடர்ந்து, 7.30 மணியளவில், புளியந்தாங்கல் ஏரிக்கோடி செல்வ விநாயகர் கோயிலில் இருந்து மேளதாள வாத்தியங்களுடன் 108 பால்குட ஊர்வலம் புறப்பட்டு முத்தாலம்மன் கோயிலை வந்தடைந்தது.
தொடர்ந்து, 9 மணியளவில் பெண்களும், சிறுவர்களும் நீண்ட வரிசையில் நின்று, முத்தாலம்மனுக்கு தாங்கள் கைகளால் பாலாபிஷேகம் செய்து வழிபட்டனர். பின்னர், சிறப்பு அபிஷேகம், மகா தீபாராதனை, அன்ன தானம் ஆகியவை நடைபெற்றன. இதில், புளியந்தாங்கல், ஏரிக்கோடி உள்ளிட்ட பகுதிகளைச் சேர்ந்த திரளான பொதுமக்கள் கலந்துகொண்டு அம்மனை வழிபட்டனர். நிகழ்ச்சிக்கான ஏற்பாடுகளை புளியந்தாங்கல், ஏரிக்கோடி கிராம பால்குட விழாக் குழுவினர்கள், கோயில்  நிர்வாகிகள், கிராம பொது மக்கள், இளைஞர்கள் உள்ளிட்டோர் செய்திருந்தனர்.