தென்பெண்ணை-பாலாறு இணைப்புத் திட்டம்: அக்.3-இல் நடைபயணம்

தென்பெண்ணை-பாலாறு நதிகள் இணைப்புத் திட்டத்தின் முக்கியத்துவம் குறித்து பொதுமக்களிடம் விழிப்புணர்வு ஏற்படுத்தும் விதமாக அக்டோபர் 3-ஆம் தேதி வேலூர் மாவட்டத்தில் இருவேறு இடங்களில் இருந்து நடைபயணம் தொடங்க பாலாறு பாதுகாப்பு விழிப்புணர்வு இயக்கம் முடிவு செய்துள்ளது.
இந்த இயக்கத்தின் சார்பில் தென்பெண்ணை-பாலாறு இணைப்புத் திட்டத்தை தமிழக அரசு உடனடியாக நிறைவேற்ற வலியுறுத்தி ஆலோசனைக் கூட்டம் வேலூர் சத்துவாச்சாரியில் உள்ள தமிழ்நாடு அரசு ஊழியர் சங்கக் கட்டடத்தில் செவ்வாய்க்கிழமை நடைபெற்றது. இயக்கத்தின் அமைப்பாளர் ச.ந.ச.மார்த்தாண்டன் தலைமையில் நடைபெற்ற இந்த கூட்டத்தில் பல்வேறு விவசாய சங்க நிர்வாகிகள், சமூக ஆர்வலர்கள் பங்கேற்றனர். 
இந்தக் கூட்டத்தில், தென்பெண்ணை-பாலாறு இணைப்புத் திட்டத்தின் முக்கியத்துவம் குறித்து பொதுமக்களிடம் விழிப்புணர்வு ஏற்படுத்தும் விதமாக வேலூர் மாவட்டத்தில் இரு குழுக்களாக பிரிந்து நடைபயணம் நடத்துவதென முடிவு செய்யப்பட்டது. 
இதன்படி, ஒரு குழு வெள்ளக்கல்நத்தம் பகுதியில் இருந்தும், மற்றொரு குழு பெரும்புலிப்பாக்கம் பகுதியில் இருந்தும் அக்டோபர் 3-ஆம் தேதி நடைப்பயணத்தைத் தொடங்கப்படுகிறது. வழியில் ஆங்காங்கே பொதுக்கூட்டங்கள் நடத்தியும், துண்டுப் பிரசுரங்களை விநியோகித்தும் விழிப்புணர்வு ஏற்படுத்தப்படும். இவ்விரு குழுக்களும் அக்டோபர் 7-ஆம் தேதி சத்துவாச்சாரி ஆர்.டி.ஓ சாலையில் இணைந்து பொதுக்கூட்டம் நடத்திவிட்டு மறுநாள் ஆட்சியரிடம் மனு அளிக்கப்படும். இந்த நடைபயணத்தில் பொதுமக்களை பெருமளவில் பங்கேற்கச் செய்யவும் தீர்மானிக்கப்பட்டது.