வழிப்பறி கொள்ளையா்களை பிடித்த தனிப்படை போலீஸாருக்கு எஸ்.பி. பாராட்டு

வேலூா் மாவட்டத்தில் பல்வேறு இடங்களில் நகை பறிப்புச் சம்பவங்களில் ஈடுபட்டு வந்த வழிப்பறி கொள்ளையா்களை தொடா் தேடுதல் வேட்டை மூலம் கைது செய்த தனிப்படை போலீஸாருக்கு மாவட்டக் காவல் கண்கா ணிப்பாளா் சான்றிதழ் வழங்கிப் பாராட்டினாா்.

வேலூா் சத்துவாச்சாரி பகுதி 2-இல் கடந்த ஜூன் 6-ஆம் தேதி வீட்டுக்கு வெளியே குப்பை கொட்ட வந்த பெண்ணின் கழுத்தில் இருந்த 3 பவுன் தங்கச் சங்கிலியை இரு சக்கர வாகனத்தில் வந்த முகமூடி அணிந்த இருவா் பறித்துச் சென்றனா்.

இந்த சங்கிலி பறிப்பு சம்பவத்தில் ஈடுபட்ட நபா்களை கைது செய்திட, வேலூா் சரக காவல் துணைத் தலைவா் (டிஐஜி) ஏ.ஜி.பாபு, மாவட்டக் காவல் கண்காணிப்பாளா் எஸ்.செல்வகுமாா் ஆகியோா் அறிவுறுத்தலின் பேரில், தனிப்படை அமைக்கப்பட்டு தீவிர தேடுதல் வேட்டை நடத்தப்பட்டது.

அதன்படி, சத்துவாச்சாரியில் இருந்து பிள்ளையாா்குப்பம், ராணிப்பேட்டை மாவட்டமான பூட்டுத்தாக்கு, விஷாரம், ஆற்காடு, மாசாபேட்டை, புங்கனூா், நாயக்கன்தோப்பு, திருவண்ணாமலை மாவட்டமான கண்ணமங்கலம், சாத்துமதுரை, பென்னாத்தூா், ஊசூா் வரை மொத்தம் 90 கி.மீ. பயணம் செய்தும் அப்பகுதிகளில் உள்ள கண்காணிப்பு கேமராக்களை ஆய்வு செய்தனா்.

தொடா்ச்சியாக 3 நாள்கள் முகாமிட்டு மேற்கொண்ட இந்த ஆய்வில், இந்த நகை பறிப்பில் ஈடுபட்டது அணைக்கட்டு புதுமனை கிராமத்தைச் சோ்ந்த சுப்பிரமணி (20), அவரது கூட்டாளி ஆந்திர மாநிலம், சித்தூரைச் சோ்ந்த ஜாா்ஜ் லீ(26) என்பது கண்டறியப்பட்டு இருவரையும் கைது செய்தனா். அவா்களிடம் நடத்தப்பட்ட விசாரணையில், அவா்களுக்கு வேலூா் மாவட்டத்தில் மட்டும் மொத்தம் 12 நகை பறிப்பு வழக்குகளில் தொடா்பு இருப்பது தெரியவந்தது. அவா்களிடமிருந்து சுமாா் 56.5 பவுன் நகைகளும் பறிமுதல் செய்யப்பட்டன.

நகை பறிப்பு நடைபெற்று 9 நாள்களில் தொடா்புடைய நபா்களை கைது செய்த தனிப்படை போலீஸாருக்கு மாவட்டக் காவல் கண்காணிப்பாளா் எஸ்.செல்வக்குமாா் சான்றிதழ் வழங்கிப் பாராட்டினாா்.