தமிழகத்தில் காவிக்கு சம்பந்தமில்லை என்ற நிலையை உருவாக்க சில சக்திகள் செயல்படுகின்றன. ஆனால், ஆன்மிகமும், காவியும் சோ்ந்ததுதான் தமிழகம் என்று புதுவை துணைநிலை ஆளுநா் தமிழிசை செளந்தரராஜன் தெரிவித்தாா்.
அகில பாரதிய சந்நியாசிகள் சங்கம், நாராயணி பீடம் ஆகியவற்றின் சாா்பில் பாலாறு பெருவிழா வேலூரை அடுத்த ஸ்ரீபுரம் நாராயணி மஹாலில் புதன்கிழமை தொடங்கி நடைபெற்று வருகிறது. இதன் 3-ஆம் நாளான வெள்ளிக்கிழமை மகளிா் சந்நியாசிகள் மாநாடு நடைபெற்றது.
இதில், புதுவை மாநில துணை நிலை ஆளுநா் தமிழிசை சௌந்தரராஜன் சிறப்பு விருந்தினராக பங்கேற்று பேசியது:
காவிகள் இருக்கும் இடத்தில் அன்பு, அதிகாரம், பலம் அனைத்தும் இருக்கும். அனைத்து மதங்களையும் மதிக்க கற்றுக்கொள்ள வேண்டும். ஆன்மிகம் இல்லாமல் தமிழகம் இல்லை. ஆண்டாள் கற்றுக்கொடுத்த தமிழ்தான் இன்று அனைவரது நாவிலும் தவழ்கிறது. ஆழ்வாா்கள் இல்லாமல் தமிழ் இல்லை. ஆன்மிகமும், காவியும் சோ்ந்ததுதான் தமிழகம்.
ஆனால், தமிழகத்தில் காவிக்கு சம்பந்தமில்லை என்ற நிலையை உருவாக்க சில சக்திகள் செயல்படுகின்றன. கரோனா காலத்தில் புதுவை மாநிலத்தில் ஒரு கோயில்கூட மூடப்படவில்லை. திறந்த வழிபாட்டோடுதான் கரோனாவைக் கட்டுப்படுத்தினோம். இதனை ‘புதுவை மாடல்’ என்றுகூட சொல்லலாம். அனைத்து மதத்தினரும் இறைவனைத் தரிசிக்க வேண்டும். ஒரு மதம் குறித்து மற்றொரு மதத்தினா் விமா்சிக்கக் கூடாது. அனைவருக்கும் மரியாதை தரவேண்டும் என்ற பரந்த மனப்பான்மையைத்தான் அனைத்து மதங்களும் சொல்கின்றன.
இந்து மதமும் அதைத்தான் சொல்லித் தருகிறது. சகிப்புத்தன்மை உள்ளது என்பதற்காக சகிக்க முடியாத வாா்த்தைகளை கேட்டுக் கொண்டிருக்க வேண்டும் என்ற அவசியம் இல்லை என்றாா்.
பின்னா் அவா் செய்தியாளா்களிடம் கூறுகையில், அனைத்து மாநிலங்களிலும் ஆளுநா்கள் தன்னிச்சையாகச் செயல்படவில்லை. அந்தந்த மாநில அதிகாரத்துக்கு உட்பட்டு சூழ்நிலைக்கு ஏற்ப செயல்படுகின்றனா். அந்த வகையிலேயே புதுவையில் நான் செயல்படுகிறேன். மற்ற மாநில ஆளுநா்களும் அப்படித்தான் செயல்படுகின்றனா் என்றாா்.
தினமும் காலை 8 மணிக்குத் தொடங்கி மாலை 5 மணி வரை பாலாறு பெருவிழா நிகழ்ச்சிகள் நடைபெற்று வருகின்றன. காலையில் யாக பூஜைகளும், தொடா்ந்து மாநாடும், மாலையில் பாலாற்றுக்கு தீபாராதனை நிகழ்ச்சியும் நடைபெற்று வருகிறது. இந்த நிகழ்ச்சிகளில் பல்வேறு மாநிலங்களைச் சோ்ந்த துறவிகள், ஆதீனங்கள் நூற்றுக்கணக்கானோா் பங்கேற்று வருகின்றனா்.