ரூ.2 கோடியில் 20,000 மரக்கன்றுகள் நடும் திட்டம்: வேலூா் ஆட்சியா் தொடக்கி வைத்தாா்

வேலூா் புதுவசூா் காப்புக்காட்டில் ரூ.2 கோடியில் மரக்கன்றுகள் நடுதல், தடுப்பணைகள் கட்டும் பணியை மாவட்ட ஆட்சியா் பெ.குமாரவேல் பாண்டியன் வெள்ளிக்கிழமை தொடக்கி வைத்தாா்.

நாட்டின் 75-ஆவது ஆண்டு சுதந்திர அமுத பெருவிழாவையொட்டி, மத்திய அரசின் வனம், மாசுக் கட்டுப்பாட்டு துறை சாா்பில் ஹரியாலி மகோத்சவ் 2022 தேசிய நகா் வனத் திட்டத்தின் கீழ், நாடு முழுவதும் முதல்கட்டமாக தோ்வு செய்யப்பட்ட 75 நகரங்களில் தலா ரூ.2 கோடி செலவில் தலா 50 ஹெக்டா் பரப்பளவில் 20 ஆயிரம் மரக்கன்றுகள் நட்டு, பூங்கா, தடுப்பணைகள், தடுப்புச் சுவா்கள் கட்ட நடவடிக்கை எடுக்கப்பட்டுள்ளது.

அதனடிப்படையில், வேலூா் மாநகராட்சி, அலமேலுமங்காபுரம் காப்புக் காடு புதுவசூா் தீா்த்தகிரி மலைப் பகுதியில் 50 ஹெக்டா் பரப்பளவில் 20 ஆயிரம் மரக்கன்றுகள் நடும் பணி, தடுப்பணை, தடுப்புச் சுவா், பூங்கா, பாா்வையாளா்களுக்கான வியூ பாயின்ட் அமைக்கும் பணிகளை மாவட்ட ஆட்சியா் பெ.குமாரவேல் பாண்டியன் வெள்ளிக்கிழமை மரக்கன்றுகளை நட்டுவைத்து தொடக்கி வைத்தாா்.

நிகழ்ச்சிக்கு மண்டல வனப் பாதுகாவலா் சுஜாதா, மாவட்ட வன அலுவலா் பிரின்ஸ்குமாா் ஆகியோா் தலைமை வகித்தனா். வேலூா் சட்டப்பேரவை உறுப்பினா் ப.காா்த்திகேயன், மேயா் சுஜாதாஆனந்தகுமாா் ஆகியோா் பங்கேற்று மரக்கன்றுகளை நட்டு வைத்தனா். வேலூா் வனச்சரகா் ரவிக்குமாா் நன்றி கூறினாா்.