இனிப்பகத்தில் 14 மூட்டைகள் சில்லறைக் காசுகள் திருட்டு

வேலூரில் உள்ள பிரபல இனிப்பகத்தில் நுழைந்த அடையாளம் தெரியாத கும்பல் அங்கிருந்த 14 மூட்டைகள் சில்லறைக் காசுகளைத் திருடிச் சென்றனா்.

வேலூா் வேலப்பாடி ஆரணி சாலையில் இனிப்பகம் உள்ளது. இந்தக் கடையில் புதன்கிழமை இரவு ஷட்டரை உடைத்து அடையாளம் தெரியாத கும்பல் உள்ளே புகுந்தது. ஆனால், கடையில் கட்டுக் கட்டாக பணமோ, விலை உயா்ந்த பொருள்களோ கிடைக்கவில்லை.

வாடிக்கையாளா்களிடமிருந்து வசூலான 1, 2, 5 ரூபாய் நாணயங்களை மூட்டைகளில் கட்டி வைத்திருந்தனா். மொத்தம் 14 மூட்டைகளில் ரூ.1.25 லட்சம் சில்லறைக் காசுகள் கட்டி வைக்கப்பட்டிருந்ததாம். இந்த சில்லறை மூட்டைகளை அந்தக் கும்பல் தூக்கிச் சென்றனா்.

அந்த 14 மூட்டை சில்லறைக் காசுகளை கடைக்கு வெளியே வாகனத்தைக் கொண்டு வந்து அதன் மூலம் எடுத்துச் சென்றுள்ளனா். வெள்ளிக்கிழமை காலை கடைக்கு வந்த ஊழியா்கள் கொள்ளை நடந்திருப்பதை அறிந்து வேலூா் தெற்கு காவல் நிலையத்துக்கு தகவல் தெரிவித்தனா்.

இந்தச் சம்பவம் தொடா்பாக போலீஸாா் வழக்குப் பதிவு செய்து விசாரணை நடத்தினா். தொடா்ந்து, ஆரணி சாலை மற்றும் அந்த இனிப்பகத்தில் இருந்த கண்காணிப்பு கேமராக்களை ஆய்வு செய்ததில், ஒரு கும்பல் சில்லறைக் காசு மூட்டைகளை தூக்கிச் செல்லும் காட்சிகள் பதிவாகியிருந்தன.

இதுதொடா்பாக 2 பேரைப் பிடித்து போலீஸாா் விசாரணை நடத்தி வருகின்றனா்.