தேக்கம்பட்டி ஊராட்சி அலுவலகத்தில் லஞ்ச ஒழிப்பு போலீஸார் திடீர் சோதனை

மேட்டுப்பாளையத்தை அடுத்த தேக்கம்பட்டி ஊராட்சி அலுவலகத்தில் லஞ்ச ஒழிப்பு மற்றும் ஊழல் தடுப்பு காவல் துறையினர் திங்கள்கிழமை திடீர் ஆய்வு செய்தனர்.

இந்த ஊராட்சியில் அரசு ஒதுக்கிய நிதியை தவறாகப் பயன்படுத்தி வருவதாகவும், தமிழகத்திலேயே முதன்முறையாக இந்த ஊராட்சியில் திருநங்கைகளுக்காகக் கட்டப்பட்ட பசுமை வீடுகள் திட்டத்தில் பல லட்சம் ரூபாய் முறைகேடு நடந்துள்ளதாகவும் ஊர் பொதுமக்கள் சார்பில் லஞ்ச ஒழிப்பு துறையினரிடம் புகார் அளிக்கப்பட்டிருந்தது.

 அதைத் தொடர்ந்து திங்கள்கிழமை தேக்கம்பட்டி ஊராட்சி அலுவலகத்திற்குள் அதிரடியாக நுழைந்த லஞ்ச ஒழிப்பு, ஊழல் தடுப்புப் பிரிவு போலீஸார் அங்குள்ள கோப்புகளை ஆய்வு செய்தனர். ஊராட்சியில் மேற்கொள்ளப்பட்ட பல்வேறு வளர்ச்சி திட்டப் பணிகளுக்கு வழங்கப்பட்ட காசோலைகள் குறித்தும் ஆய்வு செய்தனர். இந்த ஆய்வு சுமார் 3 மணி நேரம் நீடித்தது. இதையடுத்து அங்கிருந்து முக்கிய ஆவணங்களை அவர்கள் எடுத்து சென்றுள்ளனர்.