355 சிறு கோயில்களுக்கு ரூ.8.66 லட்சத்தில் பூஜை பொருள்கள்

கோவை மாவட்டத்தில் உள்ள 355 சிறு கோயில்களுக்கு ரூ.8.66 லட்சத்திலான பூஜை உபகரணங்கள் வழங்கும் திட்டத்தை நகராட்சி நிர்வாகத்துறை அமைச்சர் எஸ்.பி.வேலுமணி சனிக்கிழமை தொடங்கி வைத்தார்.

தமிழகம் முழுவதிலும் உள்ள பூஜை செய்ய வசதி இல்லாத சுமார் 10 ஆயிரம் சிறு கோயில்களுக்கு தலா ரூ.2,440 மதிப்பிலான பித்தளைத் தாம்பாளம், தூபக்கால், மணி, கார்த்திகை விளக்கு, தொங்கு விளக்கு ஆகிய 5 பூஜை உபகரணங்கள் வழங்க முதல்வர் ஜெயலலிதா உத்தரவிட்டுள்ளார்.

அதன்படி, கோவை மாவட்டத்தில் உள்ள 355 கோயில்களுக்கு பூஜை உபகரணங்கள் வழங்கும் நிகழ்ச்சி கோவை கோணியம்மன் திருக்கோயிலில் நடைபெற்றது. ஆட்சியர் அர்ச்சனா பட்நாயக் தலைமையில் நடைபெற்ற இந்த நிகழ்ச்சியில், அமைச்சர் எஸ்.பி.வேலுமணி கலந்து கொண்டு கோயில் பூசாரிகளுக்கு உபகரணங்களை வழங்கினார்.

கோவை மாநகராட்சி மேயர் ப.ராஜ்குமார், சட்டப்பேரவை உறுப்பினர்கள் ஆர்.சின்னசாமி, வி.சி.ஆறுக்குட்டி, கோவை மண்டல இந்து சமய அறநிலையத் துறை இணை ஆணையர் இளம்பரிதி, உதவி ஆணையர் ஆனந்த் உள்ளிட்டோர் நிகழ்ச்சியில் கலந்து கொண்டனர்.