நான்கு வழிச்சாலையாக மாற்ற பெ.நா.பாளையத்தில் ஆய்வு

பெரியநாயக்கன்பாளையத்திலிருந்து மேட்டுப்பாளையம் வரை உள்ள இருவழிச் சாலையை நான்குவழிச் சாலையாக மாற்றுவதற்காக தேசிய நெடுஞ்சாலைத்துறை அதிகாரிகள் பெரியநாயக்கன்பாளையத்தில் சனிக்கிழமை ஆய்வு மேற்கொண்டனர்.

கோவை- மேட்டுப்பாளையம் தேசிய நெடுஞ்சாலையில் வடகோவையிலிருந்து- தெற்குப்பாளையம் பிரிவு வரை உள்ள சாலை நான்கு வழிச் சாலையாக அண்மையில் மாற்றப்பட்டது. தற்போது தெற்குப்பாளையம் பிரிவிலிருந்து மேட்டுப்பாளையம் வரை இருவழிச் சாலையாக உள்ள இச்சாலையை நான்கு வழிச்சாலையாக மாற்ற மத்திய அரசு ரூ.200 கோடி நிதி ஒதுக்கியுள்ளது.

இந்நிலையில் இச்சாலையின் போக்குவரத்து பயன்பாடு, கட்டமைப்பு வசதிகள், மரங்களை அகற்றுதல், பாலங்கள் அமைப்பது ஆகியவை குறித்து தேசிய நெடுஞ்சாலைத்தறை உதவிக் கோட்டப் பொறியாளர் எஸ்.குழந்தைராஜ் தலைமையில் உதவிப் பொறியாளர் வி.பி.ஜெயப்பிரகாஷ் மேற்பார்வையில் 20-க்கும் மேற்பட்ட வித்யாலய ஐடிஐ மாணவர்கள் ஆய்வு மேற்கொண்டனர்.

ஆய்வின் அடிப்படையில் பெறப்படும் தகவல்கள், மத்திய அரசின் பார்வைக்கு அனுப்பி வைக்கப்படவுள்ளது. அனுமதி கிடைத்தவுடன் நான்கு வழிச்சாலைக்கான பணிகள் தொடங்கப்படும் என நெடுஞ்சாலைத்துறை அதிகாரிகள் தெரிவித்தனர்.