ஓணம் பண்டிகை, வேளாங்கண்ணி திருவிழா:  கோவை வழியாக சிறப்பு ரயில்கள் இயக்கம்

ஓணம் பண்டிகை, வேளாங்கண்ணி மாதா கோயில் திருவிழாவை முன்னிட்டு கோவை வழியாக எர்ணாகுளம், வேளாங்கண்ணிக்கு சிறப்பு ரயில்கள் இயக்கப்பட உள்ளன. 
இதுகுறித்து சேலம் ரயில்வே கோட்டம் புதன்கிழமை வெளியிட்டுள்ள செய்திக் குறிப்பு:
கேரளத்தில் ஓணம் பண்டிகை வரும் ஆகஸ்ட் 24-ஆம் தேதி கொண்டாடப்படுகிறது. இதை முன்னிட்டு, 
சென்னை-கொச்சுவேலி சிறப்பு ரயில் (வண்டி எண்-06047)  சென்னையில் ஆகஸ்ட் 21 ஆம் தேதி பிற்பகல் 3 மணி அளவில் புறப்பட்டு மறுநாள் காலை 6.45 மணி அளவில் கொச்சுவேலி சென்றடையும்.  அதே போல், மறுமார்க்கத்தில் கொச்சுவேலி-சென்னை சென்ட்ரல் சிறப்பு ரயிலானது ஆகஸ்ட் 22,  28-ஆம் தேதி பிற்பகல் 12.30 மணி அளவில் புறப்பட்டு மறுநாள் காலை 7.40 மணி அளவில் சென்னை சென்றடையும். இந்த ரயிலானது அரக்கோணம், காட்பாடி, ஜோலார்பேட்டை, சேலம், ஈரோடு, திருப்பூர், கோவை, பாலக்காடு, திருச்சூர், ஆலுவா, எர்ணாகுளம் டவுன், கோட்டயம், திருவல்லா, செங்கனூர், காயங்குளம், கொல்லம் ரயில் நிலையங்களில் நின்று செல்லும். 
சென்னை-எர்ணாகுளம் சந்திப்பு சுவிதா சிறப்பு ரயில் (வண்டி எண்-82615 ) சென்னையில் இருந்து ஆகஸ்ட் 23-ஆம் தேதி இரவு 10.30 மணிக்குப் புறப்பட்டு மறுநாள் காலை 10.55 மணிக்கு எர்ணாகுளம் சென்றடையும். 
இந்த ரயிலானது காட்பாடி, ஜோலார்பேட்டை, சேலம், ஈரோடு, திருப்பூர், கோவை, பாலக்காடு, திருச்சூர், ஆலுவா வழியாக எர்ணாகுளம் சென்றடையும்.  அதே போல் மறு மார்க்கத்தில் எர்ணாகுளம் சந்திப்பு-சென்னை சென்ட்ரல் (வண்டி எண்-06014) ஆகஸ்ட் 24-ஆம் தேதி பிற்பகல் 2.45 மணிக்குப் புறப்பட்டு மறுநாள் அதிகாலை 4.50 மணிக்கு சென்னை சென்றடையும். 
இந்த ரயிலானது ஆலுவா,பாலக்காடு, கோவை, திருப்பூர், ஈரோடு, சேலம், ஜோலார்பேட்டை, காட்பாடி, பெரம்பூர் வழியாக சென்னை சென்றடையும். 
வேளாங்கண்ணி மாதா கோயில் தேவாலயத்தில் கொடியேற்றம் ஆகஸ்ட் 29 ஆம் தேதியும்,  திருவிழா செப்டம்பர் 8 ஆம் தேதியும் நடைபெறவுள்ளதை முன்னிட்டு  எர்ணாகுளம் சந்திப்பு-வேளாங்கண்ணி சிறப்பு ரயில் (வண்டி எண்-06016) ஆகஸ்ட் 28, 31, செப்டம்பர் 4, 7- ஆகிய தேதிகளில் எர்ணாகுளத்தில் இருந்து பிற்பகல் 1 மணி அளவில் புறப்பட்டு மறுநாள் வேளாங்கண்ணி சென்றடையும். வேளாங்கண்ணி-எர்ணாகுளம் சந்திப்பு சிறப்பு ரயில் (வண்டி எண்-06015) ஆகஸ்ட் 29, செப்டம்பர் 2, 5, 9 ஆகிய தேதிகளில் பிற்பகல் 1.40 மணி அளவில் எர்ணாகுளத்தில் இருந்து புறப்பட்டு மறுநாள் வேளாங்கண்ணி சென்றடையும். 
இந்த ரயிலானது ஆலுவா, திருச்சூர், பாலக்காடு, கோவை, திருப்பூர், ஈரோடு, கரூர், திருச்சி, தஞ்சாவூர் வழியாக நாகப்பட்டினம் சென்றடையும்.