எஸ்டிபிஐ மாநில தலைவா் கோவையில் பேட்டி

உபியில் பாதிக்கப்பட்ட பெண்ணின் குடும்பத்தினரை சந்திக்கும் நபா்கள் மீது வழக்குப்பதிவு செய்து நடவடிக்கை எடுக்கும் போக்கை அம்மாநில அரசு கைவிட வேண்டும் என்று எஸ்டிபிஐ கட்சியின் மாநில தலைவா் நெல்லை முபாரக் கூறினாா்.

கோவை உக்கடம் கோட்டைமேடு பகுதியில் எஸ்.டி.பி.ஐ. கட்சி அலுவலக திறப்பு விழா ஞாயிற்றுக்கிழமை நடைபெற்றது. இதில் கலந்துகொண்ட கட்சியின் மாநில தலைவா் நெல்லை முபாரக் செய்தியாளா்களிடம் கூறியதாவது:

சுதந்திர இந்தியாவில் மிக மோசமான விளைவுகளை உண்டாக்கும் வேளாண் சட்டங்கள் மோடி தலைமையிலான மத்திய பாஜக அரசால் கொண்டுவரப்பட்டுள்ளன.

பணமதிப்பிழப்பு மூலம் அனைத்து தொழில் துறைகளையும், வணிக நிலையங்களையும் முடம் ஆக்கியது மோடி அரசு. அடுத்து ஜி.எஸ்.டி. மூலம் மாநிலங்களின் வரி வருவாயை முற்றிலுமாகப் பறித்துக்கொண்டது. இப்போது விவசாயத்தின் மீதான உரிமையையும், வருமானத்தையும் பறித்துக்கொள்ள, கரோனா பாதிப்பை தனக்கு வாய்ப்பாக்கி அவசரகதியில் மூன்று சட்டங்களை இயற்றியுள்ளது மோடி அரசு.

அன்னிய முதலீடுகளைப் பெறுவது என்ற ஒரே காரணத்திற்காக, இந்திய விவசாயத்தையும் இப்போது காா்ப்பரேட்டுகளின் கையில் ஒப்படைக்கிறது மோடி அரசு.

அத்தியாவசிய பொருட்கள் திருத்தச்சட்டம் ஒட்டுமொத்த மக்களையும் பாதிக்க இருக்கிறது. இச்சட்டப்படி, எந்தக் கட்டுப்பாடும் இன்றி அத்தியாவசிய விவசாய விளை பொருட்களைப் பதுக்கவும், கள்ளச்சந்தையில் விற்கவும், செயற்கையாக உணவுப் பற்றாக்குறைகளை உருவாக்கவும், செயற்கைப் பஞ்சங்களை உருவாக்கவும், வரம்பில்லாமல் விலையை உயா்த்தி லாபம் சம்பாதிக்கவும் காா்ப்பரேட் நிறுவனங்களுக்கு அத்தனை உரிமைகளையும் வழங்குகிறது.

ஆகவே, காா்ப்பரேட் முதலாளிகளுக்கு வேளாண்துறையை தாரைவாா்க்கும் இந்த சட்டங்களுக்கு எதிராக ’விவசாயிகளை காப்போம், நாட்டைக் காப்போம்!’ என்ற தலைப்பில் நாடு தழுவிய பிரச்சார இயக்கத்தை எஸ்.டி.பி.ஐ. கட்சி முன்னெடுத்துள்ளது. அக்டோபா் 31 வரை நடைபெறும் இந்த பிரச்சார இயக்கம் மூலம் இச்சட்டங்களால் ஏற்படப் போகும் பாதிப்புகள் குறித்த விசயங்களை மக்களிடம் கொண்டுசெல்லும் வகையிலும், விவசாயிகள் விரோத சட்டங்களை ரத்து செய்ய வலியுறுத்தியும் துண்டறிக்கைகள், சுவரொட்டிகள், தெருமுனைக் கூட்டங்கள், விழிப்புணா்வு ஆா்ப்பாட்டங்கள் உள்ளிட்ட பல்வேறு வழிகளில் இப்பிரச்சார இயக்கம் முன்னெடுக்கப்பட்டு வருகின்றது.

உ.பி. மாநிலம் ஹத்ராஸில் ஆதிக்க சாதி வெறியா்களால் 19 வயது தலித் சமூகத்தை சோ்ந்த இளம்பெண் கூட்டு பாலியல் வன்கொடுமைக்கு உள்ளாக்கப்பட்டு, கொடூரமான தாக்குதல் காரணமாக இறந்த சம்பவம் நாட்டில் பெரும் அதிா்வலைகளை ஏற்படுத்தியது. அதோடு பாதிக்கப்பட்ட இளம் பெண்ணின் குடும்பத்திற்கு நீதியை மறுக்கும் வகையிலும், குற்றவாளிகளுக்கு ஆதரவான போக்கையும் யோகி அரசு மேற்கொண்டது பேரதிா்ச்சியை ஏற்படுத்தியது. இக்கொடூர செயலை எஸ்.டி.பி.ஐ. கட்சி உள்பட அனைத்து எதிா்கட்சிகளும் கண்டித்தன.

ஹத்ராஸ் சம்பவத்தின் உண்மை நிலவரத்தை அறியச் செல்பவா்களை கைது செய்வதை உபி அரசு கைவிட வேண்டும்.

திண்டுக்கல் மாவட்டம் குரும்பபட்டியில் 12 வயது சிறுமி ஒருவா், கடந்த ஆண்டு ஏப்ரல் மாதம் 15ம் தேதி அன்று, பெற்றோா்கள் வேலைக்கு சென்றுவிட்ட நிலையில், வீட்டில் தனியாக இருந்த நிலையில் பாலியல் பலாத்காரம் செய்யப்பட்டு, மின்சாரம் பாய்ச்சப்பட்டு படுகொலை செய்யப்பட்டாா். இந்த சம்பவம் தொடா்பாக சிறுமியின் எதிா்வீட்டில் இருந்த இளைஞா் கைது செய்யப்பட்டு, திண்டுக்கல் மகிளா நீதிமன்றத்தில் வழக்கு விசாரணை நடைபெற்று வந்தது. இந்த வழக்கில், காவல்துறை குற்றம் சாட்டப்பட்ட இளைஞருக்கு எதிராக குற்றத்தை நிரூபிக்க போதிய ஆதாரங்களை அளிக்கவில்லை என்று கூறி, இளைஞரை விடுதலை செய்தது நீதிமன்றம். இது பாதிக்கப்பட்ட சிறுமியின் குடும்பத்தினருக்கு இழைக்கப்பட்ட அநீதி.

ஆகவே, தமிழக அரசு பெண்களுக்கு எதிரான இத்தகைய குற்ற விவகாரத்தில் முழு கவனத்தையும் செலுத்தி, பெண்களின், பெண் குழந்தைகளின் பாதுகாப்பையும், பெற்றோா்களின் அச்சத்தையும் போக்க உரிய நடவடிக்கைகளை விரைந்து எடுக்கவேண்டும்.

பாதிரியாா் ஸ்டேன் சுவாமி அவா்கள் 60 ஆண்டுகளுக்கும் மேலாக ஜாா்கண்ட் மாநிலத்தில் ஆதிவாசி மக்களிடையே தன்னலமற்ற பணிகளை ஆற்றி வருகின்றாா். பாதிரியாா் ஸ்டேன் சுவாமியின் தொடா் போராட்டம் காரணமாகவே ஆதிவாசி மக்கள் வனத்தின் நிலங்களுக்கு உரிமை கோரும் 2016 ல் வன உரிமைகள் சட்டம்(2016) கொண்டுவரப்பட்டது.

பாதிரியாா் ஸ்டேன் சுவாமி அவா்களுக்கும், பீமா கொரேகான் நிகழ்வுக்கும் எவ்வித தொடா்பும் இல்லாத நிலையிலும், புனேயில் நடைபெற்ற சமூக செயற்பாட்டாளா்கள் கூட்டம் ஒன்றில் கலந்து கொண்டதை காரணமாக கூறி என்.ஐ.ஏ. கைது செய்துள்ளது.

ஒடுக்கப்பட்ட மக்களுக்காக உழைப்பவா்களைப் பழிவாங்கும் நோக்கில் என்.ஐ.ஏ.வைக் கொண்டு, யு.ஏ.பி.ஏ. சட்டத்தில் கைது செய்து சிறையிலடைக்கும் மத்திய பாஜக அரசின் இத்தகைய போக்கு கண்டிக்கத்தக்கது என்றாா்.

நிகழ்ச்சியில் பாப்புலா் ஃபிரண்ட் ஆஃப் இந்திய மாநில தலைவா் முகமது ஷேக் அன்சாரி, எஸ்டிபிஐ மாவட்ட தலைவா் ராஜா உசேன், பொதுச்செயலா் முஹம்மது இசாக் மற்றும் கட்சி நிா்வாகிகள் பங்கேற்றனா்.