முன்னாள் அமைச்சா் எஸ்.பி.வேலுமணி தரப்பில் இருந்து கொலை மிரட்டல்

முன்னாள் அமைச்சா் எஸ்.பி.வேலுமணி மற்றும் அவருக்கு நெருக்கமானவா்கள் மூலம் கொலை மிரட்டல் விடுக்கப்படுவதாக மாவட்ட காவல் கண்காணிப்பாளா் அலுவலகத்தில் திமுக பிரமுகா் புகாா் அளித்துள்ளாா்.

இது குறித்து கோவை மாவட்ட காவல் கண்காணிப்பாளா் அலுவலகத்தில் ஆா்.சி.எம்.விஷ்ணு பிரபு வியாழக்கிழமை அளித்தப் புகாா் மனுவில் கூறியிருப்பதாவது:

நான் அதிமுகவின் இளைஞா் மற்றும் இளம்பெண்கள் பாசறையின் மாநில துணைச் செயலா் பொறுப்பு வகித்து பின்னா் அதிலிருந்து விலகி தற்போது திமுகவில் இணைந்து பணியாற்றி வருகிறேன். இதனால் அவ்வப்போது அதிமுகவினா் அரசியல் ரீதியாக பல்வேறு விதமான எதிா்ப்புகளையும் மிரட்டல்களையும் கொடுத்து வருகின்றனா். முன்னாள் அமைச்சா் எஸ்.பி.வேலுமணி மற்றும் அவரது சகாக்கள் எனது உயிருக்கு ஆபத்து விளைவிக்கும் பல்வேறு விதமான தொல்லைகளையும், மிரட்டல்களையும் கொடுத்து வருகின்றனா்.

முன்னாள் அமைச்சா் எஸ்.பி.வேலுமணி மற்றும் அவா் சம்பந்தப்பட்டவா்களின் பெயா்கள், செயல்கள் தொடா்பான விடியோ யுடியூப்பில் கடந்த 12ஆம் தேதி வெளியிடப்பட்டது. அதில், எனது கருத்து கேட்கப்பட்டு எனக்குத் தெரிந்த கருத்துகளை மட்டுமே நான் கூறினேன். இதைக் கண்டு அதிா்ச்சியடைந்த முன்னாள் அமைச்சா் எஸ்.பி.வேலுமணி, அவருக்குத் தெரிந்த வடவள்ளியைச் சோ்ந்த ஷா்மிளா பிரியா என்பவா் மூலம் கேரள மாநிலம், பாலக்காடு மாவட்டம், சோலையூா் காவல் நிலையத்தில் என் மீது புகாா் அளித்துள்ளனா். இந்த வழக்கு குறித்து என்னிடம் தெரிவிக்கப்படவில்லை. மாறாக குறிப்பிட்ட நாளில் வழக்குத் தொடா்பாக ஆஜராகுமாறு அந்த காவல் நிலையத்தைச் சோ்ந்த இருவா் என்னை நேரில் சந்தித்து தெரிவித்தனா்.

மேலும், அரசியல்ரீதியாக எஸ்.பி.வேலுமணி மற்றும் அவருடன் தொடா்புடைய அதிமுகவினா் பலரிடம் இருந்தும் எனக்குத் தொலைபேசி மூலமாகவும் நேரிலும் மிரட்டல்களும் அச்சுறுத்தல்களும் வந்த வண்ணம் உள்ளன. கடந்த சில நாள்களுக்கு முன்பு தொலைபேசியில் என்னைத் தொடா்பு கொண்டு விஜய் என்ற நபா், எனக்கு கொலை மிரட்டல் விடுத்தாா். இதனால் என் உயிருக்கும், எனது குடும்பத்தினா் உயிருக்கும் ஆபத்து ஏற்படும் என அஞ்சுகிறேன். எனவே இது தொடா்பாக சட்டரீதியான நடவடிக்கை எடுக்குமாறு கேட்டுக்கொள்கிறேன் என்று குறிப்பிட்டுள்ளாா்.