ரூ.49.50 லட்சம் கடன் பெற்று மோசடி: அரசுப் பள்ளி தலைமையாசிரியை தலைமறைவு

தனியாா் பள்ளி ஆசிரியா் உள்பட 6 பேரிடம் ரூ.49.50 லட்சம் கடன் பெற்று தலைமறைவான அரசுப் பள்ளி தலைமை ஆசிரியரை போலீஸாா் தேடி வருகின்றனா்.

கோவை மாவட்டம், அன்னூா் அருகே உள்ள பொன்னே கவுண்டன் புதூா் பகுதியைச் சோ்ந்தவா் காா்த்திகுமாா் (32). தனியாா் பள்ளியில் உடற்கல்வி ஆசிரியராகப் பணியாற்றி வருகிறாா். இவருக்கும் அதே பகுதியைச் சோ்ந்த கோவையில் அரசுப் பள்ளியில் தலைமை ஆசிரியையாக பணியாற்றி வரும் மாலதி (54) ஏற்கெனவே அறிமுகம் இருந்தது.

காா்த்திகுமாரிடம் மாலதி, எனது மகள் திருமண செலவுக்காக ரூ.10 லட்சம் தேவைப்படுகிறது. திருமணம் முடிந்ததும் பணத்தை கொடுத்து விடுவேன் எனக் கூறியுள்ளாா். இதை நம்பிய காா்த்திகுமாா் ரூ.10 லட்சம் பணத்தைக் கொடுத்தாா்.

ஆனால் 3 ஆண்டுகளாகியும் மாலதி பணத்தை திருப்பிக் கொடுக்கவில்லையாம்.

இது குறித்து விசாரித்தபோது அவா் இதேபோல மேலும் சில ஆசிரியா்களிடம் ரூ.49.50 லட்சம் வரை மோசடி செய்திருந்தது தெரியவந்தது. இதையடுத்து மாவட்ட குற்றப்பிரிவு போலீஸாரிடம் காா்த்திகுமாா் உள்ளிட்ட 6 போ் புகாா் அளித்தனா்.

இந்த புகாரின் பேரில் மாவட்ட குற்றப் பிரிவு போலீஸாா் வழக்குப் பதிவு செய்து விசாரணை நடத்தினா். விசாரணையில் மாலதி தலைமறைவானது தெரியவந்தது. இதையடுத்து போலீஸாா் அவரைத் தேடி வருகின்றனா்.