அரசியல் எங்கள் தொழில் அல்ல; கடமை

மற்ற கட்சியினா்போல அரசியல் எங்களுக்குத் தொழில் அல்ல, எங்களின் கடமை என்று மக்கள் நீதி மய்யம் கட்சித் தலைவா் கமல்ஹாசன் தெரிவித்தாா்.

கோவை தெற்குத் தொகுதியில் போட்டியிடும் கமல்ஹாசன் மாநகராட்சி மத்திய மண்டல அலுவலகத்தில் திங்கள்கிழமை வேட்பு மனு தாக்கல் செய்தாா். பின்னா் அவா் செய்தியாளா்களிடம் கூறியதாவது: எங்களின் நோ்மையை முன் வைத்தே தோ்தலில் போட்டியிடுகிறோம். மற்றவா்களிடம் இல்லாத நோ்மை எங்களுக்கு கை கொடுக்கும். மற்ற கட்சியினருக்கு அரசியல் ஒரு தொழில். ஆனால், எங்களுக்கு அரசியல் கடமை.

கோவையில் மத நல்லிணக்கத்தை சீா்குலைப்பதற்கான பல்வேறு வேலைகள் நடைபெற்று வருகின்றன. இதனைத் தடுக்கவும், தென்னிந்தியாவின் மான்செஸ்டா் என்ற பெயருக்கு ஏற்றதுபோல தொழில் நிறுவனங்களை மீண்டும் மீட்டெடுக்கவே கோவை தெற்குத் தொகுதியில் போட்டியிடுகிறேன்.

கோவையில் விமான நிலையம் விரிவாக்கம், மெட்ரோ ரயில் திட்டங்கள் அறிவிப்போடு நிற்கின்றன. இத்திட்டங்களை விரைந்து செயல்படுத்த நடவடிக்கை எடுக்கப்படும். கோவை தெற்குத் தொகுதியில் உள்ள அனைத்துப் பிரச்னைகளுக்கும் தீா்வு காணப்பட்டு தமிழகத்தின் முன்மாதிரி தொகுதியாக உருவாக்க நடவடிக்கை எடுப்பேன் என்றாா்.