உயிரிழந்த பள்ளி மாணவியின் விவரங்களை வெளியிட்ட 41 யூ டியூப் சேனல்கள் மீது போக்ஸோவில் வழக்கு

கோவையில் பாலியல் தொல்லையால் தற்கொலை செய்துகொண்ட பள்ளி மாணவியின் விவரங்களை வெளியிட்ட 41 யூ டியூப் சேனல்கள் மீது போக்ஸோவின் கீழ் போலீஸாா் வழக்குப் பதிவு செய்துள்ளனா்.

கோவையைச் சோ்ந்த 17 வயதுப் பள்ளி மாணவி அவா் பயின்ற தனியாா் பள்ளி ஆசிரியா் மிதுன் சக்ரவா்த்தி அளித்த பாலியல் தொல்லை காரணமாக கடந்த சில நாள்களுக்கு முன்பு தற்கொலை செய்துகொண்டாா்.

கோவை மேற்கு அனைத்து மகளிா் போலீஸாா் இது தொடா்பாக ஆசிரியா் மிதுன் சக்ரவா்த்தி, தனியாா் பள்ளி முதல்வா் மீரா ஜாக்சன் ஆகியோரைக் கைது செய்து சிறையில் அடைத்தனா்.

பாலியல் வன்கொடுமை, தொல்லைகளுக்கு உள்ளாகும் சிறுவா், சிறுமியரின் பெயா், புகைப்படங்கள் உள்ளிட்ட எந்த விவரங்களையும் இணையதளங்கள், சமூக வலைதளங்கள் தொலைக்காட்சிகள், நாளிதழ்கள், வானொலி என எதிலும் வெளியிடக் கூடாது என உச்ச நீதிமன்றம் 2018இல் ஒரு வழக்கில் உத்தரவிட்டது. பாதிக்கப்பட்டவா்களின் பாதுகாப்பு மற்றும் தனியுரிமையைப் பாதுகாக்கும் நோக்கில் இந்த உத்தரவு பிறப்பிக்கப்பட்டது.

ஆனால், கோவையில் பாலியல் தொல்லையால் உயிரிழந்த மாணவியின் புகைப்படம், அவரது இருப்பிடம், பெற்றோா் பெயா், படித்த பள்ளி, உடன் படித்த மாணவா்கள் என பல்வேறு விவரங்களை பல்வேறு இணையதளச் செய்தி பக்கங்கள், யூடியூப், முகநூல், ட்விட்டா் பக்கங்கள் உள்ளிட்டவற்றில் பலா் வெளியிட்டிருந்தனா்.

இந்நிலையில் உச்ச நீதிமன்ற உத்தரவை மீறும் வகையில் செயல்பட்டிருக்கும் 41 யூ டியூப் சேனல்கள் மீது கோவை மாநகர போலீஸாா் போக்ஸோ சட்டத்தின் கீழ் வழக்குப் பதிவு செய்துள்ளனா். இதில் சில யூ டியூப் சேனல்கள் உயிரிழந்த மாணவியின் பெற்றோரின் பேட்டி, அவரது புகைப்படம், இருப்பிடம், பயின்ற பள்ளி, உடன் படித்த மாணவா்கள் உள்ளிட்ட பல்வேறு விவரங்களை வெளியிட்டிருந்தது குறிப்பிடத்தக்கது.