சிறுமிக்கு பாலியல் தொல்லை: முதியவருக்கு 5 ஆண்டுகள் சிறை

சிறுமிக்குப் பாலியல் தொல்லை கொடுத்த முதியவருக்கு 5 ஆண்டுகள் சிறைத் தண்டனையும், ரூ.5,000 அபராதமும் விதித்து கோவை நீதிமன்றம் தீா்ப்பளித்துள்ளது.

கோவையைச் சோ்ந்தவா் மோகன் (எ) மோகன்ராஜ் (65), கூலி வேலை செய்து வருகிறாா். 6-ஆம் வகுப்பு படித்து வந்த அவரின் பேரன், தன்னுடன் படித்து வரும் 12 வயது சிறுமியுடன் சோ்ந்து விளையாடி வந்துள்ளாா்.

இந்நிலையில், கடந்த 2022 ஆகஸ்ட் மாதத்தில் சிறுமியும், அவரது பேரனும் விளையாடிக்கொண்டிருந்தனா். அப்போது, அறைக்குள் ஒளிந்துகொண்ட சிறுமிக்கு, மோகன்ராஜ் பாலியல் தொல்லை கொடுத்துள்ளாா். மேலும், இதனை வெளியே சொன்னால் கொலை செய்து விடுவதாகவும் மிரட்டியுள்ளாா்.

இது குறித்து சிறுமியின் பெற்றோா் மகளிா் காவல் நிலையத்தில் புகாா் அளித்தனா். அதன்பேரில், வழக்குப் பதிவு செய்த போலீஸாா் மோகன்ராஜை பிடித்து விசாரணை நடத்தினா். அதில், அவா் சிறுமிக்கு பாலியல் தொல்லை கொடுத்தது உறுதிசெய்யப்பட்டது. இதையடுத்து, அவரை போக்ஸோ சட்டத்தின்கீழ் போலீஸாா் கைது செய்தனா்.

இந்த வழக்கு கோவை போக்ஸோ சிறப்பு நீதிமன்றத்தில் நடைபெற்று வந்தது. விசாரணை நிறைவடைந்த நிலையில், இவ்வழக்கில் வியாழக்கிழமை தீா்ப்பளிக்கப்பட்டது.

நீதிபதி குலசேகரன் அளித்த தீா்ப்பில், மோகன்ராஜுக்கு 5 ஆண்டுகள் சிறைத் தண்டனையும் ரூ.5,000 அபராதமும் விதித்து உத்தவிட்டுள்ளாா். மேலும், கொலை செய்து விடுவதாக மிரட்டிய பிரிவுக்கு ஓராண்டு சிறையுடன், ரூ.1,000 அபராதமும் விதித்து, இதனை ஏக காலத்தில் அனுபவிக்கவும் உத்தரவிட்டுள்ளாா்.

மேலும், பாதிக்கப்பட்ட சிறுமிக்கு அரசு சாா்பில் ரூ.2 லட்சம் இழப்பீடு வழங்க வேண்டும் என்றும் அறிவுறுத்தியுள்ளாா்.