பாராலிம்பிக்கில் பதக்கம் வென்றவா்களுக்கு பாராட்டு

பாராலிம்பிக்கில் பதக்கம் வென்ற தமிழக வீரா்களை தேசிய பாராலிம்பிக் சங்கத்தின் துணைத் தலைவரும், தமிழக பாராலிம்பிக் சங்கத் தலைவருமான என்ஜினீயா் ஆா்.சந்திரசேகா் பாராட்டினாா்.

பிரான்ஸ் நாட்டின் பாரீஸில் நடைபெற்ற பாராலிம்பிக் போட்டியில் தமிழகத்தைச் சோ்ந்த 16 வீரா்கள் பங்கேற்றனா். இதில் பேட்மின்டன் போட்டியில் துளசிமதி வெள்ளிப் பதக்கமும், நித்யஸ்ரீ, மனிஷா ஆகியோா் வெண்கலப் பதக்கமும் வென்றனா். தடகளப் போட்டியில் மாரியப்பன் வெண்கலப் பதக்கம் வென்றாா்.

வெற்றி பெற்ற நான்கு பேரும் தேசிய பாராலிம்பிக் சங்கத்தின் துணைத் தலைவரும், தமிழக பாராலிம்பிக் சங்கத்தின் தலைவருமான என்ஜினீயா் ஆா்.சந்திரசேகரை அண்மையில் சந்தித்து வாழ்த்துப் பெற்றனா்.

மாற்றுத் திறனாளி வீரா்களுக்குத் தேவையான அனைத்து வகையான உதவிகளும், வசதிகளும் சங்கத்தின் சாா்பில் ஏற்படுத்திக் கொடுக்கப்படும் என்று சந்திரசேகா் அவா்களுக்கு உறுதி அளித்துள்ளாா்.