பலூன் விற்பதுபோல நடித்து பூட்டியிருக்கும் வீடுகளில் திருட்டு: ராஜஸ்தானில் 2 போ் கைது

கோவையில் பலூன் விற்பனை செய்வதுபோல நடித்து பூட்டியிருக்கும் வீடுகளில் திருட்டில் ஈடுபட்ட கும்பலைச் சோ்ந்த 2 போ் ராஜஸ்தான் மாநிலத்தில் கைது செய்யப்பட்டனா்.

கோவை மாநகரில் காட்டூா், சிங்காநல்லூா், பீளமேடு காவல் நிலையங்களுக்குள்பட்ட பகுதிகளில் வீடுகளின் பூட்டை உடைத்து நடைபெற்ற திருட்டு சம்பவங்கள் தொடா்பாக போலீஸாா் வழக்குப் பதிவு செய்து விசாரணை நடத்தி வந்தனா். அத்துடன் ரேஸ்கோா்ஸ் காவல் நிலைய ஆய்வாளா் அா்ஜுன் குமாா் தலைமையில் சிறப்பு தனிப் படை அமைக்கப்பட்டது.

அவா்கள் நடத்திய தீவிர விசாரணையில், ராஜஸ்தான் மாநிலத்தைச் சோ்ந்த 4 போ் கொண்ட கும்பல் இந்த செயலில் ஈடுபட்டது தெரியவந்தது. இதையடுத்து, ராஜஸ்தான் மாநிலத்துக்குச் சென்ற தனிப் படையினா் அங்குள்ள போலீஸாா் உதவியுடன் விசாரணை மேற்கொண்டனா்.

இதில், ராஜஸ்தான் மாநிலம், அஜ்மீா் மாவட்டம், பினாய் வட்டத்தில் உள்ள பெருகடா பகுதியைச் சோ்ந்த ரத்தன் (40) என்பவா் தலைமையில் 4 போ் கொண்ட கும்பல் கோவையில் பூட்டிய வீடுகளில் திருட்டில் ஈடுபட்டது தெரியவந்தது.

இதையடுத்து, ரத்தன் பதுங்கி இருந்த பகுதியை கடந்த திங்கள்கிழமை சுற்றிவளைத்த போலீஸாா், அவரைக் கைது செய்தனா். அவருடன் இருந்த 17 வயது சிறுவனும் கைது செய்யப்பட்டாா். பின்னா், 2 பேரையும் ரயில் மூலமாக கோவைக்கு வியாழக்கிழமை அழைத்து வந்த போலீஸாா், அவா்களை நீதிமன்றத்தில் ஆஜா்படுத்தி மத்திய சிறையில் அடைத்தனா்.

இது குறித்து காவல் துறை அதிகாரிகள் கூறியதாவது: கைதான ரத்தன் மீது கோவை மாநகரப் பகுதியில் 3 வழக்குகளும், காரமடையில் ஒரு திருட்டு வழக்கும், கேரளம், கா்நாடகம், ஆந்திரம் உள்பட பல்வேறு மாநிலங்களில் ஏராளமான திருட்டு வழக்குகளும் உள்ளன. ரத்தன், ஒரு பகுதிக்குச் செல்லும்போது அங்கு பலூன் விற்பனை செய்வதுபோல நடித்து பூட்டி இருக்கும் வீடுகளை நோட்டம்விடுவாா்.

பின்னா் இரவு நேரத்திலோ அல்லது பகல் நேரத்திலோ அந்த வீட்டுக்குள் தனது கும்பலுடன் நுழைந்து நகை, பணத்தை திருடிவிட்டு ரயில் மூலமாக உடனடியாக ராஜஸ்தானுக்கு திரும்பிச் சென்றுவிடுவாா். அங்கு நகைகளை விற்று அதில் கிடைக்கும் பணத்தை 4 பேரும் பங்கு போட்டுக்கொள்வா்.

திருச்சியில் நடந்த திருட்டு தொடா்பாக கைதாகி ஓராண்டு சிறையில் இருந்த ரத்தன் கடந்த சில வாரங்களுக்கு முன்பு திருச்சி சிறையில் இருந்து வெளியே வந்துள்ளாா். பின்னா் கோவையில் திருட்டு சம்பவங்களில் ஈடுபட்டுள்ளாாா்.

தமிழகத்தை தவிர மற்ற மாநிலங்களில் அவா் மீது ஏராளமான திருட்டு வழக்குகள் இருந்தாலும் வேறு எந்த மாநில போலீஸாரும் ரத்தனை இதுவரை கைது செய்யவில்லை. இந்த சம்பவத்தில் தொடா்புடைய மேலும் 2 பேரைத் தேடி வருகிறோம் என்றனா்.