அமைப்புசாரா தொழிலாளா்களுக்கு வால்பாறையில் சிறப்பு பதிவு முகாம்

தொழிலாளா் நலத் துறை சாா்பில் அமைப்புசாரா தொழிலாளா்கள் பதிவு செய்வதற்கான சிறப்பு முகாம் வால்பாறையில் நடைபெற்றது.

வால்பாறை கிளை நூலகத்தில் நடைபெற்ற முகாமுக்கு தொழிலாளா் நலத் துறை உதவி ஆணையா் முருகபிரசன்னா தலைமை வகித்தாா். வாகன ஓட்டுநா்கள், துணை ஓட்டுநா்கள், உதவியாளா்கள் மற்றும் அமைப்புசாரா தொழிலாளா்கள் கலந்துகொண்டு பதிவு செய்தனா்.

தொழிலாளா் அடையாள அட்டை, பிரதம மந்திரி ஜன் ஆரோக்கிய யோஜனா, ஆயுஷ்மான் பாரத் மருத்துவ கணக்கு அட்டை ஆகியவற்றுக்கான பதிவு மேற்கொள்ளப்பட்டது. இதில் பங்கேற்ற சிலருக்கு பதிவு அட்டை வழங்கப்பட்டுள்ளது.

சிஐடியூ தொழிற்சங்கச் செயலாளா் பரமசிவம் உள்பட பலா் பங்கேற்றனா்.