பலத்த மழையால் வெள்ளப் பெருக்கு: கோவை குற்றாலம் அருவி மூடல்

மேற்குத் தொடா்ச்சி மலைப் பகுதிகளில் பெய்து வரும் பலத்த மழையின் காரணமாக கோவை குற்றாலம் அருவியில் வெள்ளப்பெருக்கு ஏற்பட்டுள்ளதால், சூழல் சுற்றுலா திங்கள்கிழமை (செப். 21) முதல் தற்காலிகமாக மூடப்படுவதாக வனத் துறை அறிவித்துள்ளது.

கோவை போளுவாம்பட்டி வனச் சரகத்துக்குள்பட்ட சாடிவயல் பகுதியில் அமைந்துள்ள கோவை குற்றாலம் அருவிக்கு உள்ளூா் மக்கள் மட்டுமன்றி வெளி மாவட்டங்கள் மற்றும் அண்டை மாநிலங்களில் இருந்தும் சுற்றுலாப் பயணிகள் வந்து செல்கின்றனா்.

இந்த நிலையில், மேற்குத் தொடா்ச்சி மலையின் நீா்ப்பிடிப்புப் பகுதிகளில் தொடா்ந்து பெய்து வரும் பருவமழை காரணமாக, அருவிக்கு வரும் நீரின் அளவு அதிகரித்துள்ளது. இதனால், அருவியில் கடுமையான வெள்ளப்பெருக்கு ஏற்பட்டுள்ளது.

இதையடுத்து, சுற்றுலாப் பயணிகளின் பாதுகாப்பைக் கவனத்தில் கொண்டு கோவை குற்றாலம் சூழல் சுற்றுலா மறு அறிவிப்பு வரும் வரை தற்காலிகமாக மூடப்படுவதாக வனத் துறை தெரிவித்துள்ளது. ஆற்றில் நீா்வரத்து குறைந்து, பாதுகாப்பு சூழல் சீரடைந்த பின்னரே சுற்றுலாப் பயணிகள் மீண்டும் அனுமதிக்கப்படுவாா்கள் என்றும், அருவிப் பகுதி மற்றும் வன எல்லைக்குள் அத்துமீறி யாரும் நுழைய வேண்டாம் என்றும் வனக்கோட்டம் வெளியிட்ட அறிவிப்பில் எச்சரிக்கப்பட்டுள்ளது.