பெருந்துறை சிப்காட்டில் உணவு பூங்கா தொடங்க வலியுறுத்தல்

பெருந்துறை சிப்காட்டில் உணவுப் பூங்கா, ஆராய்ச்சி மையம் தொடங்க வேண்டும் என ஈரோடு மாவட்ட அனைத்துத் தொழில் வணிகச் சங்கங்களின் கூட்டமைப்பு வலியுறுத்தியுள்ளது.

இக்கூட்டமைப்பின் செயற்குழுக் கூட்டம் ஈரோட்டில் வியாழக்கிழமை நடைபெற்றது. கூட்டத்துக்கு, கூட்டமைப்பின் தலைவர் என்.சிவநேசன் தலைமை வகித்தார். பொதுச்செயலர் வி.கே.ராஜமாணிக்கம் முன்னிலை வகித்தார். மாவட்ட ஆட்சியர் எஸ்.பிரபாகர் சிறப்பு விருந்தினராகப் பங்கேற்றார்.

 ஈரோடு மாவட்டத்தில் மேற்கொள்ளப்பட வேண்டிய வளர்ச்சித் திட்டப் பணிகள் தொடர்பாக ஆட்சியர் பிரபாகரிடம், இக்கூட்டமைப்பு நிர்வாகிகள் அளித்த மனு விவரம்:

 காய்கறிகள், பழங்கள் கெடாமல் பாதுகாக்க குளிர்சாதனக் கிடங்குகள் அனைத்து வட்டங்களிலும் அமைக்க வேண்டும். இவைகளில் சூரிய ஒளி மின்சக்தி பயன்பாட்டை கொண்டு வர வேண்டும். தாளவாடியில் சுய உதவிக் குழுக்களுடன் இணைந்து மூலிகை பூங்கா, மூலிகை ஏற்றுமதி மண்டலம் அமைக்க வேண்டும்.

 சத்தியமங்கலத்தில் வாசனை திரவிய மையம் அமைக்க வேண்டும். ஈரோடு மாநகரில் மஞ்சளில் இருந்து பவுடர், ஆயில், ஒலியோரேசின் எனும் ரசாயன வேதிப்பொருள் தயாரிக்கும் தொழிற்சாலைகள் தொடங்கப்பட வேண்டும்.

அனைத்து வேளாண் பொருள்களின் மீதான வணிக செஸ் அறவே நீக்கப்பட வேண்டும். பெருந்துறை சிப்காட்டில் உணவுப் பூங்கா, உணவு ஆராய்ச்சி மையம் தொடங்கப்பட வேண்டும் எனத் தெரிவித்துள்ளனர்.