சத்திரம் மாரியம்மன் கோயில் திருவிழா: கம்பத்துக்குப் புனிதநீர் ஊற்றி வழிபாடு

ஈரோடு, வீரப்பன்சத்திரத்தில் மாரியம்மன் கோயில் திருவிழாவையொட்டி, கம்பத்துக்குப் புனித நீர் ஊற்றி பெண்கள் புதன்கிழமை வழிபட்டனர்.
இக்கோயிலில் ஆண்டுதோறும் மார்கழி மாதம் பொங்கல் திருவிழா விமரிசையாக கொண்டாடப்படும். இந்த ஆண்டுக்கான திருவிழா பூச்சாட்டுதலுடன் திங்கள்கிழமை  இரவு தொடங்கியது. இதையொட்டி, மாரியம்மனுக்கு சிறப்பு அலங்காரம் செய்யப்பட்டிருந்தது. இதைத் தொடர்ந்து, கோயிலுக்கு அருகே உள்ள தெப்பக்குளத்தில் கம்பங்களுக்கு சிறப்பு பூஜைகள் செய்யப்பட்டு அங்கிருந்து ஊர்வலமாகக் கொண்டு வரப்பட்டு கோயில் முன் கம்பங்கள் நடப்பட்டன. நாள்தோறும் பெண்கள் கம்பத்துக்கு புனித நீர் ஊற்றி வழிபட்டனர்.
இதேபோல, பெரியவலசு மாரியம்மன் கோயிலிலும், காவிரி சாலையில் உள்ள மாரியம்மன் கோயிலிலும் செவ்வாய்க்கிழமை கம்பங்கள் நடப்பட்டன. இக்கோயில்களில் டிசம்பர் 25 இல் பிற்பகலில் நடைபெறும் தீர்த்தக்குட ஊர்வலத்தில் திரளான பக்தர்கள் பங்கேற்று காவிரி ஆற்றிலிருந்து புனித நீர் எடுத்துக் கொண்டு கோயிலுக்குச் செல்கின்றனர். தொடர்ந்து, அம்மனுக்கு சிறப்பு  அபிஷேகம் நடைபெறுகிறது.
டிசம்பர் 26 ஆம் தேதி முற்பகலில் மாவிளக்கு பூஜையும், பொங்கல் இடும் நிகழ்ச்சியும் நடைபெறுகிறது. 
இதையொட்டி ஏராளமான பக்தர்கள் அலகு குத்தி நேர்த்திக் கடன் செலுத்த உள்ளனர். 27 ஆம் தேதி காலை 7 மணிக்கு கம்பம் பிடுங்கும் நிகழ்ச்சி நடைபெறுகிறது. கோயில்களில் இருந்து எடுக்கப்படும் கம்பங்கள் ஊர்வலமாக தெப்பக்குளத்துக்கு எடுத்துச் செல்லப்படுகிறது.
தொடர்ந்து, காலை 10 மணிக்கு மலர் பல்லக்கில் அம்மனின் திருவீதி உலா காட்சியும், மஞ்சள் நீராட்டு விழாவும் நடைபெறுகிறது. 28 ஆம் தேதி இரவு 7 மணிக்கு மறுபூஜையுடன் திருவிழா நிறைவடைகிறது.