கரோனா பரவலைக் கட்டுப்படுத்த வழிபாட்டுத் தலங்கள் மூடல்

கரோனா பரவலைக் கட்டுப்படுத்தும் வகையில் ஈரோடு மாவட்டத்தில் மக்கள் அதிகம் கூடும் வழிபாட்டுத் தலங்கள் வெள்ளிக்கிழமை முதல் மூன்று நாள்களுக்கு மூடப்பட்டன.

ஈரோடு மாவட்டத்தில் கரோனா பரவல் மீண்டும் அதிகரித்து வருவதால், தொற்றின் பரவலைக் குறைக்க வெள்ளிக்கிழமை முதல் மூன்று நாள்களுக்கு மக்கள் அதிகம் கூடும் வழிபாட்டுத் தலங்களைத் திறக்கத் தடை விதிக்கப்பட்டது. இதனால், கோயில்கள், பள்ளிவாசல்கள், தேவாலயங்களில் வழிபாட்டுக்கு அனுமதிக்கப்படவில்லை.

இதனால், ஈரோடு பெரிய மாரியம்மன், சின்ன மாரியம்மன், கோட்டை பத்ரகாளியம்மன் உள்ளிட்ட அம்மன் கோயில்கள், காளைமாட்டுச் சிலை அருகே உள்ள பள்ளிவாசல், சிஎஸ்ஐ பிரப் தேவாலயம் உள்ளிட்ட அனைத்து வழிபாட்டுத் தலங்களும் மூடப்பட்டன. ஆகஸ்ட் 15 ஆம் தேதி வரை வழிபாடு செய்ய பக்தா்களுக்கு அனுமதியில்லை என அறிவிப்புப் பலகை வைக்கப்பட்டுள்ளது. பக்தா்கள் வழக்கம்போல் கோயில்களின் வெளியில் நின்று வழிபட்டுச் செல்கின்றனா்.