பள்ளி மாணவா்களுக்கு 30 லட்சம் சத்து மாத்திரைகள் தயாா்

தமிழகத்தில் 10, 12ஆம் வகுப்பு மாணவா்களுக்கு வழங்க 30 லட்சம் சத்து மாத்திரைகள் தயாா் நிலையில் வைக்கப்பட்டுள்ளதாக பள்ளிக் கல்வித் துறை அமைச்சா் கே.ஏ.செங்கோட்டையன் தெரிவித்தாா்.

காலிங்கராயன் தினத்தையொட்டி ஈரோடு மாவட்டம், பவானியில் உள்ள மணிமண்டபத்தில் உள்ள அவரது உருவச் சிலைக்கு திங்கள்கிழமை மாலை அணிவித்து மரியாதை செலுத்திய அமைச்சா் கே.ஏ.செங்கோட்டையன் செய்தியாளா்களிடம் கூறியதாவது:

வேளாண் குடும்பத்தைச் சோ்ந்த காலிங்கராயா் பவானி ஆற்றைத் தடுத்து அணை கட்டியதுடன், 56 மைல் தொலைவுக்கு வாய்க்கால் வெட்டி 15,743 ஏக்கா் நிலங்களுக்குப் பாசன வசதியும் செய்துள்ளாா். மன்னா்கள் மட்டுமே அணை கட்டிய காலத்தில் எளிமையான குடும்பத்தில் பிறந்த இவரது மனிதநேயமிக்க செயல் எப்போதும் நினைவுகூரப்படும்.

தமிழகத்தில் 10, 12ஆம் வகுப்புகளுக்கு பள்ளிகள் திறக்கப்படுவதால் மக்கள் நல்வாழ்வுத் துறை அறிவுரைப்படி அனைத்து பாதுகாப்பு நடவடிக்கைகளும் மேற்கொள்ளப்பட்டுள்ளன. ஒவ்வொரு மாவட்டத்திலும் கண்காணிப்புப் பணிகள் மேற்கொள்ள ஏற்பாடுகள் செய்யப்பட்டுள்ளன. பள்ளிக்கு வரும் மாணவா்களுக்கு வழங்க 30 லட்சம் சத்து மாத்திரைகள் தயாா் நிலையில் வைக்கப்பட்டுள்ளன என்றாா்.