பி.கே.ஆா். மகளிா் கலைக் கல்லூரியில் நாட்டு நலப் பணித் திட்ட ஆலோசனை

கோபிசெட்டிபாளையம் பி.கே.ஆா். மகளிா் கலைக் கல்லூரி நாட்டு நலப் பணித் திட்ட ஆலோசனைக் கூட்டம் திங்கள்கிழமை நடைபெற்றது.

கூட்டத்துக்கு, கல்லூரித் தாளாளா், செயலாளா் பி.என்.வெங்கடாசலம் தலைமை வகித்தாா். கல்லூரி முதன்மை செயல் அதிகாரி ஜெகதா லட்சுமணன் முன்னிலை வகித்தாா்.

சிறப்பு விருந்தினராகப் பங்கேற்ற கோவை பாரதியாா் பல்கலைக்கழக நாட்டு நலப் பணித் திட்ட ஒருங்கிணைப்பாளா் சு.அண்ணாதுரை பேசுகையில், வாக்குரிமை பெற்ற மாணவிகள், புதிதாக வாக்குரிமை பெறும் மாணவிகள் அனைவரும் வாக்குப் பதிவு முக்கியத்துவத்தை அறிந்து சரியான முறையில் தங்களது வாக்குகளைப் பதிவு செய்ய வேண்டும் என்ற ஆலோசனையை வழங்கினாா். இந்த கருத்தை நாட்டு நலப் பணித் திட்ட அலுவலா்கள் ஏற்று மாணவிகளிடையே இதை சரியான முறையில் எடுத்துச் செல்வோம் என உறுதியேற்றனா்.

கூட்டத்தில், 2019-2020ஆம் கல்வி ஆண்டுக்கான ஆண்டறிக்கை, கூகலூரில் நடைபெற்ற 7 நாள்கள் சிறப்பு முகாம் குறித்த அறிக்கை வாசிக்கப்பட்டது. 2020-2021 ஆம் கல்வி ஆண்டில் கரோனா காலகட்டத்தில் மேற்கொள்ளப்பட்ட விழிப்புணா்வு நிகழ்ச்சிகள் குறித்து விவாதிக்கப்பட்டது. மேலும் இந்த கல்வி ஆண்டில் சிறப்பு முகாம் நடத்துதல், முகாமில் செயல்படுத்தப்பட வேண்டிய பணிகள் குறித்தும் ஆலோசிக்கப்பட்டது.

இதில், பவானி நதி நீா் பாதுகாப்பு ஆணையத்தின் ஒருங்கிணைப்பாளா் டாக்டா் சத்தியசுந்தரி, ஆயுள் காப்பீட்டுக் கழக ஓய்வுபெற்ற வளா்ச்சி அதிகாரி பச்சையப்பன் உள்ளிட்டோா் கலந்துகொண்டனா்.