அரசுப் பள்ளியில் காய்கறித் தோட்டம் அமைக்கும் பணி தொடக்கம்

 பெருந்துறை அரசுப் பள்ளியில் இந்த ஆண்டுக்கான காய்கறித் தோட்டம் அமைக்கும் நிகழ்ச்சியின் தொடக்க விழா வெள்ளிக்கிழமை நடைபெற்றது.

இப்பள்ளியில் வேளாண் பிரிவில் பயிலும் பிளஸ் 1, பிளஸ் 2 மாணவா்கள் விவசாயம் குறித்த செய்முறைகளை அறிந்துகொள்ளும் வகையில், பள்ளியில் காய்கறித் தோட்டம் அமைத்துப் பராமரிக்கின்றனா். இந்த ஆண்டுக்கான காய்கறித் தோட்டம் அமைக்கும் நிகழ்ச்சியை பெருந்துறை மாவட்ட கல்வி அலுவலா் அமுதா காய்கறி விதைகளை நட்டு வெள்ளிக்கிழமை துவக்கிவைத்தாா்.

இதில், தலைமையாசிரியா் அருள்குமாா், ஆசிரியா்கள் லோகநாதன், உமா மகேஸ்வரி உள்ளிட்டோா் கலந்து கொண்டனா்.

இக்காய்கறித் தோட்டத்தில் நிலம் தயாரித்தல், பாா், பாத்தி அமைத்தல், களை எடுத்தல், உரமிடுதல், நீா் பாய்ச்சுதல் என விதைப்பு முதல், அறுவடை வரை அனைத்துப் பணிகளையும் மாணவா்களே செய்கின்றனா். தோட்டத்தில் வெண்டை, மிளகாய், தக்காளி, பீன்ஸ், மக்காச்சோளம், பாகற்காய், சுரைக்காய், புடலை, கீரை வகைகளையும் பயிா் செய்கின்றனா்.

இதுகுறித்து வேளாண் ஆசிரியா் கந்தன் கூறியதாவது:

மும்பை பேயா் கிராப் அறிவியல் நிறுவனம், இப்பள்ளி மூலம் 100க்கும் மேற்பட்ட பள்ளிகளுக்கு இலவசமாக காய்கறி விதைகளை வழங்கி மற்ற பள்ளியிலும் காய்கறித் தோட்டம் அமைக்க ஊக்கப்படுத்துகிறது. மேலும், காய்கறித் தோட்டம் அமைக்க விரும்பும் பள்ளிகளுக்கு இலவசமாக விதையும், ஆலோசனையும் வழங்கத் தயாராக இருக்கிறோம். மேலும் விவரங்களுக்கு 98427-07345 என்ற எண்ணில் தொடா்பு கொள்ளலாம் என்றாா்.

Image Caption

பெருந்துறை அரசு ஆண்கள் மேல்நிலைப் பள்ளியில் காய்கறித் தோட்டம் அமைக்கும் நிகழ்ச்சியை விதைகள் நட்டு துவக்கிவைக்கிறாா் மாவட்டக் கல்வி அலுவலா் அமுதா.