சன்னியாசிபட்டியில் 107 பேருக்கு ரூ.48.66 லட்சம் நலத்திட்ட உதவிகள்

பவானி வட்டம், சன்னியாசிபட்டி ஊராட்சியில் நடைபெற்ற மாவட்ட ஆட்சியரின் மனுநீதிநாள் முகாமில் 107 பேருக்கு ரூ.48.66 லட்சம் மதிப்பிலான நலத்திட்ட உதவிகள் வியாழக்கிழமை வழங்கப்பட்டன.

இம்முகாமுக்கு, மாவட்ட ஆட்சியா் ராஜகோபால் சுன்கரா தலைமை வகித்தாா். சமூக பாதுகாப்புத் திட்ட தனித்துணை ஆட்சியா் செல்வராஜ், பவானி வட்டாட்சியா் சித்ரா, பவானி ஒன்றியக் குழுத் தலைவா் பூங்கோதை வரதராஜன், ஊராட்சித் தலைவா் சித்திரசேனன் ஆகியோா் முன்னிலை வகித்தனா். முகாமில், பொதுமக்களிடமிருந்து கோரிக்கை மனுக்கள் பெற்றப்பட்டு, துறைரீதியான நடவடிக்கைக்கு அனுப்பப்பட்டது.

முன்னதாக, ஆட்சியா் ராஜகோபால் சுன்கரா பேசுகையில், ஈரோடு மாவட்டத்தில் புதுமைப்பெண் திட்டம், தமிழ்ப்புதல்வன் திட்டம், முதலமைச்சரின் காலை உணவுத் திட்டம் உள்ளிட்ட எண்ணற்ற திட்டங்கள் செயல்படுத்தப்பட்டு வருகின்றன. அனைத்து துறை அலுவலா்களும் ஒரு கிராமத்தில் முகாமிட்டு, கோரிக்கை மனுக்களை பெற்றுக் கொண்டு, அரசின் நலத்திட்ட உதவிகள் வழங்கும் மனுநீதி நாள் முகாம்களில் பொதுமக்கள் பங்கேற்று பயனடைய வேண்டும் என்றாா்.

இம்முகாமில், 5 பேருக்கு பட்டா மாறுதல், இறப்பு சான்று, ஜாதி சான்று, விதவை சான்றுகள், 5 பேருக்கு மாதாந்திர உதவித்தொகை உள்பட 107 பயனாளிகளுக்கு ரூ.48.66 லட்சம் மதிப்பிலான நலத்திட்ட உதவிகள் வழங்கப்பட்டன. முகாமில், அனைத்துத் துறைகளின் சாா்பில் கண்காட்சி அரங்குகள் அமைக்கப்பட்டிருந்தது.