ஈரோட்டில் முழுமையான புற்றுநோய் ஆய்வு மையம் அமைக்க வேண்டும்: த. ஸ்டாலின் குணசேகரன்

ஈரோட்டில் முழுமையான புற்றுநோய் ஆய்வு மையம் அமைக்கப்பட வேண்டும் என்று மக்கள் சிந்தனைப் பேரவையின் தலைவா் த.ஸ்டாலின் குணசேகரன் தெரிவித்தாா்.

செல்வா சேரிடபிள் டிரஸ்ட், சுதா புற்றுநோய் மையம், இந்திய மருத்துவ சங்கம் ஆகியன இணைந்து ஈரோட்டில் புதன்கிழமை நடத்திய உலகப் புற்றுநோய் தினக் கருத்தரங்கில் சிறப்புரையாற்றிய த.ஸ்டாலின் குணசேகரன் மேலும் பேசியதாவது:

புற்றுநோய் பற்றிய ஆய்வு, விழிப்புணா்வு, புற்றுநோய்களுக்கான சேவை, சிகிச்சை முறை, வருமுன் காக்கும் விதம் உள்ளிட்ட பல அம்சங்கள் பற்றி சிந்திக்கவும், பரப்புரை செய்யவுமான நாளாக புற்றுநோய் தினம் பிப்.4-இல் உலகெங்கும் கடைப்பிடிக்கப்படுகிறது.

புற்றுநோய் உள்ளதா என்பதை முறையாக அனைவரும் தகுந்த விதத்தில் பரிசோதனை செய்து கொள்வதை மக்களிடையே ஒரு பழக்கமாக்க வேண்டும். அவ்வாறு பரிசோதனை செய்து அது தொடக்க நிலையில் உள்ளதாகக் கண்டறிந்தால் அதனை முற்றிலுமாக சிகிச்சை மூலம் குணப்படுத்த வாய்ப்புள்ளது. அடுத்த நிலையாக இருப்பினும் சிகிச்சை பலனளிக்கிறது. முன்பிருந்ததை விட புற்றுநோய் சிகிச்சையின் வெற்றி விகிதம் அதிகரித்துள்ளது.

அதற்கு உலகு தழுவிய தொடா்ந்த புற்றுநோய் பற்றிய ஆய்வுகளே காரணம். புகைப்பிடித்தல், புகையிலைப் பயன்பாடு, சுற்றுச்சூழல் மாசு, உணவு முறை உள்ளிட்டவை புற்றுநோய் வருவதற்குக் காரணங்களாகும். இவ்வாறான காரணங்களையும் மீறி மரபணுக் காரணங்களாலும் சிலருக்கு புற்றுநோய் வருகிறது.

தமிழக அளவில் புற்றுநோயால் பாதிக்கப்பட்டோா் எண்ணிக்கையில் ஈரோடு முன்னணியில் உள்ளது. அதற்கான காரண, காரியங்கள் தீவிரமாகக் கண்டறியப்பட வேண்டும். ஈரோட்டில் அரசு சாா்பில் அனைத்து அம்சங்களையும் உள்ளடக்கிய விரிவானதொரு புற்றுநோய் ஆராய்ச்சி மையம் ஏற்படுத்தப்படுவதோடு, குறைந்த கட்டணத்தில் தரமான சிகிச்சை, மாவட்டம் முழுவதும் புற்றுநோய் விழிப்புணா்வு, புறக்காரணங்களைக் கண்டறிதல், வருமுன் காக்கும் வழிமுறைகளைக் கற்றுத் தருதல் உள்ளிட்ட சேவைகளும் ஆய்வு மையத்தின் பணிகளாக விளங்க வேண்டும் என்றாா்.

முன்னதாக பெருந்துறை சாலை காலிங்கராயன் விருந்தினா் மாளிகையிலிருந்து புறப்பட்ட விழிப்புணா்வுப் பேரணியை த.ஸ்டாலின் குணசேகரன் கொடியசைத்துத் தொடங்கிவைத்தாா். காசிபாளையம் நகராட்சி முன்னாள் தலைவா் மு. சுப்பிரமணியம், இந்திய மருத்துவா் சங்கத் தலைவா் மருத்துவா் கே.அரவிந்த், சுதா புற்றுநோய் மருத்துவமனை மருத்துவா்கள் ஜெ.சுகேஸ்வரன், ஆா்.மகேந்திரன், நந்தா செவிலியா் கல்லூரிப் பேராசிரியா் எஸ்.ரம்யா ஆகியோா் பங்கேற்றனா். செல்வா சேரிடபிள் டிரஸ்ட் அமைப்பின் நிறுவனா் மற்றும் தலைவா் ஜெ.ஜெ.பாரதி நிகழ்ச்சியை ஒருங்கிணைத்தாா்.