தீபாவளி: ஈரோடு கடை வீதியில் அலைமோதிய மக்கள் கூட்டம்

தீபாவளிப் பண்டிகையை முன்னிட்டு, புத்தாடைகள் உள்ளிட்டவற்றை வாங்க ஈரோடு கடை வீதியில் மக்கள் கூட்டம் வெள்ளிக்கிழமை அலைமோதியது.

தீபாவளிப் பண்டிகை ஞாயிற்றுக்கிழமை (நவம்பா் 8) கொண்டாடப்பட உள்ள நிலையில், ஜவுளிகள் விற்பனை கடந்த சில நாள்களாக மும்முரமாக நடைபெற்று வருகிறது. மாவட்டத்தின் பல்வேறு பகுதிகளைச் சோ்ந்த பொதுமக்கள் ஜவுளி உள்ளிட்டவற்றை வாங்குவதற்காக ஈரோட்டில் வெள்ளிக்கிழமை குவிந்தனா்.

ஜவுளிக் கடைகள் அதிகம் உள்ள ஈரோடு ஆா்கேவி சாலை, கடைவீதி, நேதாஜி சாலை, மணிக்கூண்டு, ஈஸ்வரன் கோயில் வீதி, பன்னீா்செல்வம் பூங்கா, திருவேங்கடசாமி வீதி, மேட்டூா் சாலை ஆகிய இடங்களில் பொதுமக்கள் கூட்டம் அலைமோதியது.

அதிக அளவிலான பொதுமக்கள் ஈரோட்டுக்கு வந்ததால் ஈரோடு -மேட்டூா் சாலை, ஈவிஎன் சாலை, பிரப் சாலை, மணிக்கூண்டு, ஆா்கேவி சாலை உள்ளிட்ட பல்வேறு சாலைகளில் போக்குவரத்து நெரிசல் ஏற்பட்டது. ஆா்கேவி சாலை, மணிக்கூண்டு உள்ளிட்ட இடங்களில் போலீஸாா் போக்குவரத்து நெரிசலை ஒழுங்குபடுத்தினா்.

திருட்டு போன்ற அசம்பாவித சம்பவங்கள் நடைபெறாமல் தடுக்க மாவட்ட காவல் கண்காணிப்பாளா் கிரண் ஸ்ருதி தலைமையில் போலீஸாா் பாதுகாப்புப் பணியில் ஈடுபட்டு வருகின்றனா். மேலும், மாநகரில் பல்வேறு இடங்களில் கண்காணிப்பு கோபுரங்கள் அமைக்கப்பட்டும், சிசிடிவி கேமராக்களை பொருத்தியும் போலீஸாா் தீவிர கண்காணிப்புப் பணியில் ஈடுபட்டு வருகின்றனா்.

ரயில், பேருந்து நிலையங்களில் குவிந்த மக்கள்: மாவட்டத்தில் பல ஆயிரக்கணக்கான வெளி மாவட்ட மக்கள் குடும்பங்களுடன் தங்கி, விசைத்தறி உள்பட பல்வேறு பணிகளில் ஈடுபட்டு வருகின்றனா். தீபாவளியை முன்னிட்டு, விடுமுறை அளிக்கப்பட்டுள்ளதால் பெரும்பாலான மக்கள் தங்களது சொந்த ஊா்களுக்குச் செல்லத் தொடங்கியுள்ளனா்.

வெள்ளிக்கிழமை காலை முதலே ஈரோடு பேருந்து நிலையத்தில் ஏராளமான மக்கள் குவியத் தொடங்கினா். மக்கள் சிரமமின்றி சொந்த ஊா்களுக்குச் செல்வதற்காக அரசுப் போக்குவரத்துக் கழகம் சாா்பில் வழக்கமாக இயக்கப்படும் பேருந்துகளுடன் கூடுதலாக 100 சிறப்புப் பேருந்துகள் இயக்கப்பட்டன. இருப்பினும் கோவை, சேலம், கரூா், மதுரை பேருந்துகளில் கூட்டம் அதிக அளவில் காணப்பட்டது.

இதேபோல, ஈரோடு ரயில் நிலையத்திலும் வழக்கத்தைவிட மக்கள் கூட்டம் அலைமோதியது. அதிகாலை முதலே ரயில் நிலையத்தில் மக்கள் கூட்டம் அதிக அளவில் இருந்தது.

ரயில் நிலைய நுழைவாயில் பகுதியில் போலீஸாா் கண்காணிப்புப் பணியில் ஈடுபட்டு, பட்டாசுகள் கொண்டு செல்லப்படுகின்றவா என சோதனை மேற்கொண்ட பிறகே பயணிகளை ரயில் நிலையத்துக்குள் அனுமதித்தனா்.