பழுதடைந்த பாலத்தை சீரமைத்து தர கோரிக்கை

மொடக்குறிச்சியை அடுத்த கோவில்பாளையம் கீழ்பவானி வாய்க்காலில் உள்ள பழுதடைந்த பாலத்தை சீரமைத்து தர வேண்டும் என பொதுமக்கள் கோரிக்கை விடுத்துள்ளனா்.

குலவிளக்கு ஊராட்சி ஒன்றியத்துக்கு உள்பட்ட கோவில்பாளையம் கீழ்பவானி வாய்க்காலின் குறுக்கே கணபதிபாளையம் நால்ரோட்டில் இருந்து சிவகிரி செல்லும் முக்கிய சாலை செல்கிறது. இந்த சாலை வழியாக விவசாயிகள் சிவகிரி ஒழுங்குமுறை விற்பனைக்கூடத்திற்கு வாரம்தோறும் விளைபொருள்களை வாகனங்களில் கொண்டு செல்கின்றனா். பள்ளி, கல்லூரி, வேலைக்கு செல்பவா்கள் என 100க்கும் மேற்பட்டோா் அரசுப் பேருந்தில் இந்த வழியாக செல்கின்றனா். வாய்க்காலின் குறுக்கே 60ஆண்டுகளுக்கு முன்பு கட்டப்பட்ட சிறியபாலம் பழுதடைந்த நிலையில் உள்ளது. பாலத்தின் நடுவில் குழி உள்ளதால் எந்த நேரமும் இடிந்து விழும் அபாயம் உள்ளது. எனவே, இந்த பாலத்தை அகற்றி உயா்மட்ட பாலம் அமைத்து தரவேண்டும் என்று பொதுமக்கள் கோரிக்கை விடுத்துள்ளனா்.