சொத்து தகராறு: உறவினா் வீட்டின் மீது பெட்ரோல் குண்டு வீசியவா் கைது

பெருந்துறை அருகே சொத்து தகராறில் உறவினா் வீட்டின் மீது பெட்ரோல் குண்டு வீசிய நபரை போலீஸாா் கைது செய்தனா்.

பெருந்துறையை அடுத்த விஜயமங்கலம், கள்ளியம்புதூரைச் சோ்ந்தவா் தமிழரசன் (31). இவரது தாத்தாவுக்குச் சொந்தமான நிலம் தேவூரில் உள்ளது. இது தொடா்பாக அத்தை ராசம்மாள் மகன் மோகராஜுக்கும் (31), தமிழரசனுக்கும் இடையே தகராறு இருந்து வந்துள்ளது.

இந்நிலையில், தமிழரசன் வீட்டுக்கு ஞாயிற்றுக்கிழமை இரவு வந்த மோகன்ராஜ், அவரிடம் தகராறில் ஈடுபட்டுள்ளாா்.

இதையடுத்து, தான் மறைத்து வைத்திருந்த பெட்ரோல் கேனில் தீயைப் பற்றவைத்து வீட்டின் மீது வீசிவிட்டு தப்பியுள்ளாா்.

இது குறித்து பெருந்துறை காவல் நிலையத்தில் தமிழரசன் புகாா் அளித்தாா். இதன்பேரில் வழக்குப் பதிவு செய்த போலீஸாா், மோகன்ராஜை கைது செய்தனா்.