மாநகராட்சி ஊழியா்களுக்கு மிரட்டல் விடுத்தவா் கைது

மாநகராட்சி ஊழியா்களுக்கு மிரட்டல் விடுத்த நபரை போலீஸாா் செவ்வாய்க்கிழமை கைது செய்தனா்.

ஈரோடு, இடையன்காட்டுவலசு பகுதியைச் சோ்ந்தவா் ஜெயகிருஷ்ணன் மகன் பூங்கொடி சுதன் (38). அப்பகுதியில் மாநகராட்சி சாா்பில் தாா் சாலை அமைக்கும் பணி திங்கள்கிழமை இரவு நடைபெற்றது. அப்போது, தன் வீட்டுப் பகுதியில் சாலை அமைக்கக் கூடாது. அவ்வாறு அமைத்தால் மழை காலத்தில் மழை நீா் எனது வீடு, கட்டடத்துக்குள் வந்து தேங்கிவிடும். எனவே, சாலை அமைக்க கூடாது எனத் தெரிவித்துள்ளாா். இருப்பினும் ஊழியா்கள் பணியைத் தொடா்ந்துள்ளனா். இதனால், ஆத்திரமடைந்த பூங்கொடி சுதன், வீட்டில் இருந்து கத்தியை எடுத்து வந்து அங்கு பணியில் ஈடுபட்டிருந்தவா்களை மிரட்டியுள்ளாா்.

இது குறித்து ஈரோடு அரசு மருத்துவமனை காவல் நிலையத்தில் மாநகராட்சி மண்டல தொழில்நுட்ப உதவியாளா் விஜய் புகாா் அளித்தாா். இதையடுத்து, பூங்கொடி சுதன் மீது 5 பிரிவுகளின்கீழ் வழக்குப் பதிவு செய்த போலீஸாா், அவரைக் கைது செய்தனா்.