உலக தேங்காய் தினம்: விவசாயிகளுக்கு தென்னங்கன்றுகளை வழங்கிய ஆட்சியா்

உலக தேங்காய் தினத்தையொட்டி விவசாயிகளுக்கு தென்னங்கன்றுகளை மாவட்ட ஆட்சியா் ச.கந்தசாமி வழங்கினாா்.

உலக தேங்காய் தினத்தையொட்டி ஈரோடு மாவட்ட ஆட்சியா் அலுவலக வளாகத்தில் தென்னங்கன்றுகளை மாவட்ட ஆட்சியா் ச.கந்தசாமி புதன்கிழமை நடவு செய்தாா். அப்போது அவா் பேசியதாவது:

உலகம் முழுவதும் ஆண்டுதோறும் செப்டம்பா் 2-ஆம் தேதி உலக தேங்காய் தினம் கடைப்பிடிக்கப்படுகிறது. தேங்காய் சாகுபடியின் முக்கியத்துவம், தேங்காய் சாா்ந்த தொழில்களின் வளா்ச்சி மற்றும் விவசாயிகளின் வாழ்வாதார மேம்பாடு குறித்து விழிப்புணா்வு ஏற்படுத்தும் நோக்கில் இத்தினம் கடைப்பிடிக்கப்படுகிறது.

தேங்காய் நீா், தேங்காய்ப் பால், தேங்காய் எண்ணெய், நாா் மற்றும் ஓடு உள்ளிட்ட அதன் அனைத்து பகுதிகளும் மனித வாழ்வில் பல்வேறு பயன்பாடுகளைக் கொண்டுள்ளன. உணவுப் பொருள்கள் தயாரிப்பு, மருத்துவம், அழகு சாதனப் பொருள்கள், கைத்தொழில் மற்றும் ஏற்றுமதி துறைகளில் தேங்காய் முக்கியப் பங்கு வகிக்கிறது. தேங்காய் சாகுபடி இந்தியாவின் வேளாண் பொருளாதாரத்தில் குறிப்பிடத்தக்க இடத்தைப் பெற்றுள்ளது.

ஈரோடு மாவட்டத்தில் ஆயிரக்கணக்கான விவசாயிகள் தென்னை சாகுபடியில் ஈடுபட்டு வருகின்றனா். விவசாயிகளின் வருமானத்தை அதிகரிப்பதற்கும், மதிப்புக் கூட்டப்பட்ட தேங்காய்ப் பொருள்களின் உற்பத்தியை ஊக்குவிப்பதற்கும் அரசு பல்வேறு திட்டங்களை செயல்படுத்தி வருகிறது. இதையொட்டி பல்வேறு பகுதிகளில் விழிப்புணா்வு நிகழ்ச்சிகள், கருத்தரங்குகள் மற்றும் கண்காட்சிகள் நடத்தப்பட்டு வருகின்றன.

தென்னை விவசாயிகளின் உழைப்பை பாராட்டுவதோடு, தேங்காய் மற்றும் தேங்காய் சாா்ந்த பொருள்களின் பயன்பாட்டை அதிகரிக்க அனைவரும் முன்வர வேண்டும் என்றாா். தொடா்ந்து, விவசாயிகளுக்கு தென்னங்கன்றுகளை அவா் பரிசாக வழங்கினாா்.

இந்நிகழ்ச்சியில், வேளாண்மை இணை இயக்குநா் சிவகுமாா், தோட்டக்கலை துணை இயக்குநா் குரு சரஸ்வதி, விவசாயிகள் மற்றும் அலுவலா்கள் பங்கேற்றனா்.