ஈரோடு சந்தையில் பச்சைப் பட்டாணி கிலோ ரூ.250-க்கு விற்பனை

ஈரோடு வஉசி பூங்கா காய்கறி சந்தையில் பச்சைப் பட்டாணி கிலோ ரூ.250-க்கு விற்பனை செய்யப்படுகிறது.

இது குறித்து காய்கறி வியாபாரிகள் கூறியதாவது: உதகை, கொடைக்கானல் உள்ளிட்ட பகுதிகளில் இருந்தும், வடக்கு கா்நாடக பகுதிகளில் இருந்தும் ஈரோடு காய்கறி சந்தைக்கு பச்சைப் பட்டாணி விற்பனைக்கு கொண்டுவரப்படுகிறது. பச்சைப் பட்டாணியின் அறுவடை காலம் நவம்பரில் தொடங்கி பிப்ரவரி வரைதான்.

இதனால், அந்த மாதங்களில் மட்டும் பச்சைப் பட்டாணி வரத்து அதிகரிக்கும். கடந்த சில நாள்களாக வெயிலின் தாக்கத்தால் பச்சைப் பட்டாணியின் விளைச்சல் பாதிக்கப்பட்டு வரத்து குறைந்துள்ளது.

ஈரோடு மற்றும் சுற்றுவட்டாரப் பகுதிகளில் உள்ள சந்தைகளுக்கு தினசரி 80 முதல் 100 மூட்டை வரை பச்சைப் பட்டாணி வரத்து இருந்த நிலையில், தற்போது 40 முதல் 50 மூட்டை வரை மட்டுமே உள்ளது. இதனால், கடந்த வாரங்களில் கிலோ ரூ.70 முதல் ரூ.100 வரை விற்பனை செய்யப்பட்ட பச்சைப் பட்டாணி தற்போது ஒரு கிலோ ரூ.250-க்கு விற்பனை செய்யப்படுகிறது என்றனா்.