தேயிலை பயிரிடப்பட்டுள்ள நிலங்களை வனத் துறையிடம் ஒப்படைக்கக் கூடாது: டான் டீ நிர்வாகத்துக்குக் கோரிக்கை

டான் டீ நிர்வாகம் தற்போது தேயிலை பயிரிட்டுள்ள நிலங்களின் சில பகுதிகளை வனத் துறைக்கு ஒப்படைக்கும் முடிவை கைவிட வேண்டும் என டான் டீ ஏ.ஐ.டி.யூ.சி. தொழிற்சங்கப் பேரவை வலியுறுத்தி உள்ளது.
இந்த சங்கத்தின் பேரவைக் கூட்டம் ஞாயிற்றுக்கிழமை நடைபெற்றது. இதில்,  அரசுத் தேயிலைத் தோட்டக் கழகத்தைப் பாதுகாக்க தமிழக அரசு ரூ.39.5 கோடி நிதி ஒதுக்கி உள்ளதற்கு நன்றி தெரிவிக்கப்பட்டது. இந்த நிறுவனத்தில் பணிபுரியும் தொழிலாளர்களுக்கு வேலைவாய்ப்பும், குடியிருக்க சொந்த வீடு வழங்க வேண்டும். தமிழக அரசு வழங்கியுள்ள நிதியைப் பயன்படுத்தி தற்காலிகத் தொழிலாளர்களுக்கு வேலை வழங்க வேண்டும். அனைத்துத் தொழிலாளர்களுக்கும் வழங்கவேண்டிய விடுப்பு ஊதியம், பணக்கொடை, குறைந்தபட்ச ஊதிய நிலுவைத் தொகை போன்றவற்றை உடனடியாக வழங்க வேண்டும். 
இந்நிறுவனத்தில் காலியாக உள்ள பணியிடங்களை தகுதியான தொழிலாளர்களின் வாரிசுகளுக்கு வழங்க வேண்டும். டான் டீ நிர்வாகம் தற்போது தேயிலை பயிரிட்டுள்ள நிலங்களின் சில பகுதிகளை வனத் துறைக்கு ஒப்படைக்கும் முடிவை கைவிட வேண்டும் என்பன உள்ளிட்ட பல்வேறு தீர்மானங்கள் நிறைவேற்றப்பட்டன.
மாவட்டத் தலைவர் டி.பாலகிருஷ்ணன் தலைமையில் நடைபெற்ற கூட்டத்தில் நிர்வாகிகள், தொழிலாளர்கள் கலந்துகொண்டனர்.