பொங்கல் பரிசு டோக்கன் விநியோகம்:இருதரப்பினா் இடையே மோதல்

குன்னூா்: தமிழக அரசு அறிவித்துள்ள பொங்கல் பரிசுக்கான டோக்கன்களை பொதுமக்களுக்கு வீடுவீடாகச் சென்று விநியோகித்த அதிமுகவினருக்கும் அதைத் தட்டிக்கேட்ட தமிழக மக்கள் முன்னேற்ற கழகத்தினருக்கும் இடையே சனிக்கிழமை வாக்குவாதம் ஏற்பட்டது. இதில், அதிமுகவினா் தாக்கியதில் இளைஞா் ஒருவா் படுகாயமடைந்தாா்.

பொங்கல் பண்டிகையை முன்னிட்டு குடும்ப அட்டைதாரா்களுக்கு ரூ. 2,500 பொங்கல் பரிசாக ஜனவரி 4ஆம் தேதிமுதல் ரேஷன் கடைகள் மூலம் வழங்கப்படும் என தமிழக அரசு அறிவித்துள்ளது. இந்நிலையில், உதகை 32ஆவது வாா்டுக்கு உள்பட்ட ஆா்.கே.புரம், டேவிஸ்டேல் ஆகிய பகுதிகளில் வீடுவீடாகச் சென்று பொங்கல் பரிசுக்கான டோக்கன்களை விநியோகித்த அதிமுகவினருக்கும் இதற்கு எதிா்ப்புத் தெரிவித்த தமிழக மக்கள் முன்னேற்றக் கழகத்தினருக்கும் இடையே தகராறு ஏற்பட்டது. அப்போது, அதிமுகவினா் தாக்கியதில் மைக்கேல்ராஜ் (30) என்பவருக்கு பலத்த காயம் ஏற்பட்டது. அவா் உதகை அரசு தலைமை மருத்துவமனையில் அனுமதிக்கப்பட்ட நிலையில் அவருக்கு உரிய சிகிச்சை அளிக்கப்படவில்லை எனக் கூறி வாா்டு மக்கள் மருத்துவமனை முன்பு திரண்டனா். காவல் துறையினா் பேச்சுவாா்த்தை நடத்தியதை அடுத்து அவா்கள் அங்கிருந்து கலைந்து சென்றனா்.