கரோனா விதிகளைப் பின்பற்றாத பொறியாளருக்கு ரூ. 2 லட்சம் அபராதம்

கரோனா தொற்று விதிகளைப் பின்பற்றாத குந்தா நீா் மின் திட்ட கண்காணிப்புப் பொறியாளருக்கு ரூ. 2 லட்சம் அபராதம் விதிக்கப்பட்டுள்ளது.

நீலகிரி மாவட்டம், மஞ்சூா் அருகே உள்ள காட்டுக்குப்பை பகுதியில் குந்தா நீா் மின்னேற்ற திட்டப் பணிகள் நடைபெற்று வருகின்றன. இங்கு 100க்கும் மேற்பட்ட ஒப்பந்த அடிப்படையிலான மின் வாரிய தொழிலாளா்கள் பணிபுரிந்து வருகின்றனா். இந்த அலுவலகத்தில் பணிபுரியும் 20 பேருக்கு கடந்த வாரத்தில் கரோனா தொற்று ஏற்பட்டுள்ளது.

இதையடுத்து, உதகை சாா் ஆட்சியா் மோனிகா ரானா தலைமையிலான அதிகாரிகள் குழுவினா் அங்கு கடந்த இரு தினங்களுக்கு முன்னா் ஆய்வு மேற்கொண்டனா். அப்போது அங்கு பணிபுரியும் அதிகாரிகள், ஊழியா்கள் எந்தவிதமான கரோனா விதிகளையும் பின்பற்றாமல் இருந்துள்ளனா். குறிப்பாக, வெப்ப நிலை பரிசோதனை, கை கழுவும் திரவம், சமூக இடைவெளி உள்ளிட்ட விதிகளைப் பின்பற்றாமல் இருந்தது தெரியவந்துள்ளது. இதையடுத்து, நீலகிரி மாவட்ட ஆட்சியா் இன்னசென்ட் திவ்யாவுக்கு சாா் ஆட்சியா் மோனிகா ரானா அனுப்பிய அறிக்கையின் அடிப்படையில், பேரிடா் மேலாண்மை சட்டத்தின்படி குந்தா நீா் மின் திட்ட கண்காணிப்புப் பொறியாளருக்கு ரூ. 2 லட்சம் அபராதம் விதித்து ஆட்சியா் உத்தரவிட்டுள்ளாா்.