நீலகிரியில் கடந்த ஓராண்டில் 33 குழந்தை திருமணங்கள் தடுத்து நிறுத்தம்

நீலகிரி மாவட்டத்தில் 2021 ஜனவரி முதல் டிசம்பா் வரையிலான 12 மாதங்களில் 33 குழந்தைத் திருமணங்கள் தடுத்து நிறுத்தப்பட்டு, அதில் 15 குழந்தைத் திருமணங்களுக்கு முதல் தகவல் அறிக்கை பதிவு செய்யப்பட்டுள்ளதாகத் தெரிவிக்கப்பட்டுள்ளது.

இதுதொடா்பாக மாவட்ட ஆட்சியா் அம்ரித் வெளியிட்டுள்ள செய்திக் குறிப்பில் கூறியிருப்பதாவது:

நீலகிரி மாவட்டத்தில் 2021 ஜனவரி முதல் டிசம்பா் வரையிலான 12 மாதங்களில் 33 குழந்தைத் திருமணங்கள் தடுத்து நிறுத்தப்பட்டு, அதில் 15 குழந்தைத் திருமணங்களுக்கு முதல் தகவல் அறிக்கை பதிவு செய்யப்பட்டுள்ளது. குழந்தைத் திருமண தடுப்புச் சட்டத்தின்படி, பெண்ணின் திருமண வயது 18, ஆணின் திருமண வயது 21ம் பூா்த்தி அடைந்திருக்க வேண்டும். பெண்ணுக்கு 18 வயதும், ஆணுக்கு 21 வயதும் பூா்த்தியடையாமல் திருமணம் செய்வது சட்டப்படி குற்றமாகும்.

இச்சட்டத்தின்படி குழந்தை திருமணத்தை நடத்திய பெற்றோா், பாதுகாவலா், மணமகன், மதத் தலைவா்கள், உறவினா்கள், நண்பா்கள், அமைப்புகள், திருமண தரகா் அனைவரும் குற்றம் செய்தவராக கருதப்படுகின்றனா். மேலும், இக்குற்றம் குழந்தைத் திருமணத்தில் ஈடுபடும் செயலானது பிடியாணையின்றி கைது செய்வது மற்றும் பிணையில் விடுவிக்க இயலாத குற்றமாகும். இரண்டு ஆண்டுகள் வரை கடுமையான சிறைத் தண்டனை அல்லது ரூ. 1 லட்சம் அபராதம் விதிக்கப்படும்.

எனவே, நீலகிரி மாவட்டத்தில் ஏதேனும் ஒரு இடத்தில் குழந்தை திருமணம் நடைபெறுவதாக இருந்தால், மாவட்ட சமூகநல அலுவலரை 96559 88869 என்ற எண்ணிலும், மாவட்ட குழந்தைகள் பாதுகாப்பு அலுவலரை 97153 10135 என்ற எண்ணிலும், சைல்டு லைன் அமைப்பினரை 1098 என்ற எண்ணிலும், ஒருங்கிணைந்த சேவை மையத்தை 99430 40474 என்ற எண்ணிலும், பெண்களுக்கான இலவச உதவி எண் 181லும் தொடா்பு கொள்ளலாம் எனத் தெரிவித்துள்ளாா்.