உதகையில் அக்டோபா் 18-இல் புத்தகத் திருவிழா

நீலகிரி மாவட்ட நிா்வாகத்தின் சாா்பில் 3-ஆவது புத்தகத் திருவிழா உதகை பழங்குடியினா் பண்பாட்டு மையத்தில் அக்டோபா் 18 முதல் 27-ஆம் தேதி வரை நடைபெற உள்ளதாக ஆட்சியா் லட்சுமி பவ்யா தன்னேரு தெரிவித்துள்ளாா்.

இது குறித்து அவா் வெளியிட்டுள்ள செய்திக் குறிப்பு:

தென்னிந்திய புத்தக விற்பானையாளா்கள், பதிப்பாளா்கள் சங்கம் மற்றும் அரசுத் துறைகள் சாா்பில் புத்தகத் திருவிழா நடைபெறவுள்ளது.

உதகை பழங்குடியினா் பண்பாட்டு மையத்தில் அக்டோபா் 18 முதல் 27-ஆம் தேதி வரை நடைபெறவுள்ள இந்த புத்தகத் திருவிழாவில் சுமாா் 60-க்கும் மேற்பட்ட அரங்குகள் அமைக்கப்பட்டு பல்வேறு புத்தகங்கள் விற்பனைக்கு காட்சிப்படுத்தப்படவுள்ளன.

இப்புத்தகத் திருவிழா நடைபெறும் அனைத்து நாள்களிலும் காலை 10 மணி முதல் இரவு 7 மணி வரை பல்வேறு நிகழ்ச்சிகள் நடைபெற உள்ளன.

இந்நிகழ்ச்சியில் முன்னாள் தலைமைச் செயலாளா் வெ.இறையன்பு, சாகித்ய அகாதெமி விருதாளா் நிா்மாலயா, கலைமாமணி கு.ஞானசம்பந்தம், பட்டிமன்ற பேச்சாளா் ராஜா, ஊடகவியலாளா் க.காா்த்திகேயன், தொலைக்காட்சி நிகழ்ச்சி தொகுப்பாளா் ஈரோடு மகேஷ், கலைமாமணி புஷ்பவனம் குப்புசாமி மற்றும் குழுவினா், எழுத்தாளா் பாரதி கிருஷ்ணகுமாா் மற்றும் பல சிறப்பு விருந்தினா்கள், எழுத்தாளா்கள் கலந்து கொண்டு இந்த புத்தகத் திருவிழாவினை சிறப்பிக்க உள்ளனா்.

மேலும், மாணவ, மாணவிகளின் கலை நிகழ்ச்சிகள் மற்றும் இலக்கிய சொற்பொழிவு நிகழ்ச்சிகள் நடைபெற உள்ளன. இப்புத்தகத் திருவிழாவில் உணவு அரங்கங்கள், குழந்தைகளுக்கான விளையாட்டு அரங்கங்கள், பொழுதுபோக்கு நிகழ்ச்சிகள் இடம்பெற உள்ளன. மாணவ, மாணவிகள் மற்றும் பொதுமக்களிடம் புத்தக வாசிப்பு பழக்கத்தை அதிகப்படுத்தும் நோக்கத்துக்காக புத்தகத் திருவிழா நடைபெற உள்ளது. அனைவருக்கும் அனுமதி இலவசம். எனவே, இவ்விழாவில் அனைவரும் கலந்துகொண்டு பயனடையுமாறு அவா் தெரிவித்துள்ளாா்.