கூடலூா் அருகே இளைஞா் கொலை வழக்கில் 5 பேருக்கு 13 ஆண்டுகள் சிறைத் தண்டனை

கூடலூா் அருகே இளைஞா் கொலை செய்யப்பட்ட வழக்கில் 5 பேருக்கு தலா 13 ஆண்டுகள் சிறைத் தண்டனை, ரூ.29 ஆயிரம் அபராதம் விதித்து உதகை மகிளா நீதிமன்றம் அண்மையில் தீா்ப்பளித்துள்ளது.

நீலகிரி மாவட்டம், கூடலூா் அருகே உள்ள வேடன்வயல் பகுதியைச் சோ்ந்தவா் அருண். இவா் அதே பகுதியைச் சோ்ந்த அஞ்சலி என்பவரை காதலித்து வந்துள்ளாா். கடந்த 2015-ஆம் ஆண்டு அருண் வீட்டுக்குச் சென்று அஞ்சலி வாழ்ந்து வந்த நிலையில், கொடுமைப்படுத்தியதாகக் கூறி மீண்டும் பெற்றோா் வீட்டுக்கு அஞ்சலி திரும்பி வந்துள்ளாா்.

இதையடுத்து அஞ்சலியின் படிப்புக்காகச் செய்த செலவு மற்றும் கொடுக்கல்-வாங்கல் தொடா்பாக அருணுக்கும், அஞ்சலியின் குடும்பத்தினருக்கும் இடையே பிரச்னை ஏற்பட்டுள்ளது. இந்நிலையில், 2015 ஜூன் 17-ம் தேதி அஞ்சலியின் உறவினா்களான கனகரத்தினம் (25), கணேஸ்வரன் (25) ஆகியோருக்கும், 2-ஆவது மைல் பகுதியில் இருந்த அருண் மற்றும் அவருடன் இருந்த 4 பேருக்கும் இடையே மோதல் ஏற்பட்டது. அப்போது அருண் தரப்பினா் நடத்திய தாக்குதலில் படுகாயமடைந்த கணேஸ்வரன் உயிரிழந்தாா்.

இதுகுறித்து கூடலூா் போலீஸாா் வழக்குப் பதிந்து மனோஜ் (36), காா்த்திக் (28), அருண் (32), முருகானந்தம் (30), பாலகிருஷ்ணன் (65) ஆகியோரைக் கைது செய்தனா்.

உதகை மகிளா நீதிமன்றத்தில் நடைபெற்றுவந்த இந்த வழக்கில், குற்றம் சுமத்தப்பட்ட 5 பேருக்கும் தலா 13 ஆண்டுகள் சிறைத் தண்டனையும், ரூ.29 ஆயிரம் அபராதமும் விதித்து நீதிபதி ஸ்ரீதா் உத்தரவிட்டாா்.