பாரம்பரிய சித்த மருத்துவர்களுக்கு பதிவு வழங்கக் கோரிக்கை

பாரம்பரிய சித்த மருத்துவர்களுக்கு தமிழக அரசு பதிவு வழங்க வேண்டும் என்று தமிழ் பாரம்பரிய சித்த மருத்துவப் பாதுகாப்பு இயக்கம் கோரிக்கை விடுத்துள்ளது.
இது குறித்து முதல்வருக்கு சித்த மருத்துவப் பாதுகாப்பு இயக்கம் ஞாயிற்றுக்கிழமை அனுப்பிய  மனு விவரம்:
தமிழகத்தில் ஆயிரத்துக்கும் மேற்பட்ட பரம்பரை சித்த மருத்துவர்கள் மருத்துவ சேவையாற்றி வருகின்றனர். இவர்களுக்கு 1993ஆம் ஆண்டில் அப்போதைய முதல்வராக இருந்த ஜெயலலிதா அரசுப் பதிவு வழங்கி வாழ்வாதாரம் அளித்தார்.
மேலும், அவர் கொடிய நோய்களான டெங்கு, விஷ ஜுரம் போன்றவைகளுக்கு நிலவேம்புக் குடிநீர், மலைவேம்புக் கஷாயம், பப்பாளிச் சாறு போன்ற இயற்கை  மூலிகை மருந்துகளை அரசு மருத்துவமனைகளில் வழங்க உத்தரவிட்டு சித்த மருத்துவத்தின் சிறப்பை வெளிப்படுத்தினார்.
கருவுற்ற தாய்மார்களுக்கு மாதுளை மணப்பாகு, உரை மருந்துகள் ஆகிய 11 வகையான சித்த  சஞ்சீவி மருந்துப் பெட்டகம் வழங்கி சித்த மருத்துவத்துக்குச் சிறப்பு செய்தார். 
அதேபோல தற்போதைய அரசும் பதிவு பெறாத பரம்பரை சித்த மருத்துவர்களுக்கு அரசுப் பதிவு வழங்கிப் பாதுகாக்க வேண்டும் என தெரிவிக்கப்பட்டுள்ளது.