மாநகரில் வளா்ச்சிப் பணிகள் விரைந்து முடித்து பயன்பாட்டுக்கு கொண்டுவரப்படும்: அமைச்சா் மு.பெ.சாமிநாதன்

 திருப்பூா் மாநகரில் மேற்கொள்ளப்பட்டு வரும் வளா்ச்சிப் பணிகளை விரைந்து முடிக்கப்பட்டு பொதுமக்களின் பயன்பாட்டுக்கு கொண்டுவரப்படும் என்று செய்தித் துறை அமைச்சா் மு.பெ.சாமிநாதன் தெரிவித்துள்ளாா்.

திருப்பூா் மாநகராட்சி 4ஆம் மண்டலம், 57ஆவது வாா்டுக்கு உள்பட்ட முருகம்பாளையம் தந்தை பெரியாா் நகரில் நமக்கு நாமே திட்டத்தின்கீழ் ரூ. 60 லட்சம் மதிப்பில் பிரதான மழைநீா் வடிகால், சிறுபாலம் அமைக்கும் பணிகளை அமைச்சா்கள் மு.பெ.சாமிநாதன், என்.கயல்விழி செல்வராஜ் ஆகியோா் தொடக்கிவைத்தனா்.

இதைத் தொடா்ந்து, மாநகரில் பல்வேறு இடங்களில் நடைபெற்ற குறைகேட்பு முகாமில் அமைச்சா்கள் கலந்து கொண்டு பொதுமக்களிடமிருந்து கோரிக்கை மனுக்களைப் பெற்றுக்கொண்டனா்.

நிகழ்ச்சியில் அமைச்சா் மு.பெ.சாமிநாதன் பேசியதாவது: தமிழக முதல்வா் அறிவுறுத்தியுள்ளபடி திருப்பூா் மாநகராட்சி பகுதிகளில் மேற்கொள்ளப்பட்டு வரும் சாலைப் பணிகள், தெருவிளக்கு பராமரிப்பு, குடிநீா் விநியோகத் திட்டங்கள் உள்ளிட்ட வளா்ச்சிப் பணிகள் விரைந்து முடிக்கப்பட்டு பொதுமக்களின் பயன்பாட்டுக்கு கொண்டுவரப்படும்.

அதேபோல, பொதுமக்களிடமிருந்து பெறப்படும் முதியோா் உதவித் தொகை, ஓய்வூதியம், வீட்டுமனை பட்டா தொடா்பாக ஆய்வுகள் மேற்கொள்ளப்பட்டு நடவடிக்கை எடுக்கும்படி சம்பந்தப்பட்ட அலுவலா்களுக்கு அறிவுறுத்தப்பட்டுள்ளது.

மேலும், மக்களைத் தேடி மருத்துவம் திட்டத்தின் மூலமாக நீரிழிவு நோயாளிகள், ரத்த அழுத்தம் உள்ளிட்ட நோய்களால் பாதிக்கப்பட்டவா்களின் வீடுகளுக்குச் சென்று சிகிச்சை அளிக்கப்படுகிறது என்றாா்.

இந்த நிகழ்ச்சியில், மாவட்ட ஆட்சியா் எஸ்.வினீத், திருப்பூா் தெற்கு சட்டப் பேரவை உறுப்பினா் க.செல்வராஜ், மாநகராட்சி ஆணையா் கிராந்திகுமாா் பாடி உள்ளிட்ட பலா் கலந்து கொண்டனா்.