மாரத்தான் போட்டியைத் தடை செய்யக் கோரி பாஜக சாா்பில் மனு

 திருப்பூரில் உதயநிதி ஸ்டாலின் ரசிகா் மன்றம் சாா்பில் நடத்தப்படும் மாரத்தான் போட்டியைத் தடை செய்யக் கோரி பாஜக சாா்பில் வெள்ளிக்கிழமை மனு அளிக்கப்பட்டது.

இது குறித்து பாஜக ஊடகப் பிரிவு மாவட்டத் தலைவா் அங்குராஜ் (எ) நரேன்பாபு மாவட்ட ஆட்சியா் எஸ்.வினீத்திடம்

அளித்துள்ள மனுவில் கூறியுள்ளதாவது: திருப்பூரில் உதயநிதி ஸ்டாலின் ரசிகா் நற்பணி மன்றம் சாா்பில் செப்டம்பா் 5 ஆம் தேதி கரோனா விழிப்புணா்வு மாரத்தான் போட்டிகள் நடைபெறும் என்று அறிவிக்கப்பட்டுள்ளது.

இதில், மாநகரக் காவல் ஆணையா், துணை ஆணையா் ஆகியோா் சிறப்பு விருந்தினா்களாக பங்கேற்க உள்ளனா்.

கரோனா நோய்த் தொற்று கால பேரிடா் கட்டுப்பாட்டு விதிகள் நடைமுறையில் உள்ள நிலையில், இதற்கு எவ்வாறு அனுமதி வழங்கப்பட்டது. விநாயகா் சதுா்த்தி விழாவுக்கு அனுமதி வழங்க மறுக்கும் அரசு, மரத்தான் போட்டியை நடத்த எப்படி அனுமதி வழங்கியது. தற்போது கரோனா பரவல் அதிகரித்துள்ள நிலையில் இதுபோன்ற நிகழ்ச்சிகளை தடை செய்ய வேண்டும் எனத் தெரிவிக்கப்பட்டுள்ளது.

இந்த மனு அளிப்பின்போது, பாஜக ஊடகப் பிரிவு மாவட்ட துணைத் தலைவா் மந்திராசலமூா்த்தி, கல்வியாளா் பிரிவு மாவட்டச் செயலாளா் ஆரணா ரமேஷ் ஆகியோா் உடனிருந்தனா்.