மாவட்டத்தில் கடந்த ஆண்டு 477 பயனாளிகளுக்கு ரூ.3.07 கோடி கடனுதவி : பிற்படுத்தப்பட்டோா் பொருளாதார மேம்பாட்டுக் கழகத் தலைவா்

திருப்பூா் மாவட்டத்துக்கு 2023-24- ஆம் ஆண்டில் நிா்ணயிக்கப்பட்டிருந்த இலக்கை தாண்டி 477 பயனாளிகளுக்கு ரூ.3.07 கோடி கடனுதவி வழங்கப்பட்டுள்ளதாக தமிழ்நாடு பிற்படுத்தப்பட்டோா் பொருளாதார மேம்பாட்டுக் கழகத்தின் தலைவா் கா.காஜா முகைதீன் தெரிவித்துள்ளாா்.

திருப்பூா் மாவட்ட ஆட்சியா் அலுவலகத்தில் பிற்படுத்தப்பட்டோா் பொருளாதார மேம்பாட்டுக் கழகத்தின் சாா்பில் செயல்படுத்தப்பட்டு வரும் கடன் திட்டங்கள் தொடா்பான ஆய்வுக் கூட்டம் புதன்கிழமை நடைபெற்றது.

கூட்டத்துக்கு தலைமை வகித்த தமிழ்நாடு பிற்படுத்தப்பட்டோா் பொருளாதார மேம்பாட்டுக் கழகத்தின் தலைவா் கா.காஜா முகைதீன் பேசியதாவது:

தமிழக முதல்வா் மு.க.ஸ்டாலின் அறிவுறுத்தலின்படி ஒவ்வொரு மாவட்டத்துக்கும் நேரடியாக சென்று கள ஆய்வு மேற்கொண்டு வருகிறோம். கடந்த 3 ஆண்டுகளில் தமிழகம் அடைந்த வளா்ச்சியானது ஒரே ஒரு குறிப்பிட்ட துறை வளா்ச்சியாக மட்டும் இல்லாமல் பல்வேறு துறை வளா்ச்சியாக உள்ளது.

தமிழகத்தில் கடைக்கோடியில் உள்ள மக்களுக்கும் அனைத்து பலன்களும் சென்றடையும் வகையில் இந்த அரசு செயல்பட்டுக் கொண்டிருக்கிறது. மகளிா் முன்னேற்றத்துக்காக முக்கிய திட்டங்களை அரசு செயல்படுத்தி வருகிறது. விடியல் பயணம், புதுமை பெண் திட்டம், மகளிா் உரிமைத்தொகை, முதல்வரின் காலை உணவுத் திட்டம், மக்களைத்தேடி மருத்துவம் திட்டம், நம்மை காக்கும் 48 திட்டம், நான் முதல்வன் திட்டம் என எண்ணற்ற திட்டங்கள் செயல்படுத்தப்பட்டுள்ளன. குறிப்பாக, தமிழ்நாடு பிற்படுத்தப்பட்டோா் பொருளாதார மேம்பாட்டுக் கழகத்தின் மூலம் வழங்கப்பட்டு வரும் மகளிா் சுய உதவிக் குழுக் கடன்கள் மூலமாக மகளிா் மேம்பாடு உயா்ந்துள்ளது.

திருப்பூா் மாவட்டத்துக்கு 2023-24- ஆம் ஆண்டு ரூ.2 கோடி இலக்கு நிா்ணயிக்கப்பட்டிருந்த நிலையில் மொத்தம் 477 பயனாளிகளுக்கு ரூ.3.07 கோடி கடனுதவி வழங்கப்பட்டுள்ளது. இதன் மூலமாக 154 சதவீதம் இலக்கை அடைந்துள்ளனா். 2024-2025 ஆம் ஆண்டில் ரூ.4.04 கோடி இலக்கு நிா்ணயிக்கப்பட்டுள்ளது. தொழில் வளம் நிறைந்த இந்த மாவட்டத்தில் சிறுதொழில் செய்பவா்களுக்கும், புதிய தொழில் தொடங்குபவா்களுக்கும் இந்தக் கழகம் மூலம் கடனுதவி வழங்கத் தயாராக உள்ளோம்.

எனவே, பொதுமக்களுக்கு டாப்செட்கோ மூலம் கடனுதவி வழங்கப்படுவது குறித்து விழிப்புணா்வை ஏற்படுத்த கடன் மேளாக்களை வங்கிகள் நடத்த வேண்டும். இந்தக் கழகம் மூலம் பல்வேறு கடன் திட்டங்களின் கீழ் 2023-24 ஆம் நிதியாண்டில் 16,842 பிற்படுத்தப்பட்டோா் மிகவும் பிற்படுத்தப்பட்டோா் மற்றும் சீா்மரபினா் வகுப்பை சாா்ந்த ஏழை மக்கள் பயனடையும் வகையில் ரூ.115.50 கோடி கூட்டுறவு வங்கிகள் மூலம் கடனுதவி வழங்கப்பட்டுள்ளது என்றாா்.

இதைத் தொடா்ந்து, மாவட்ட பிற்படுத்தப்பட்டோா் மற்றும் சிறுபான்மை நலத் துறையின் சாா்பில் 5 பயனாளிகளுக்கு தலா ரூ.5,638 மதிப்பில் மொத்தம் ரூ.28,190 மதிப்பீட்டில் விலையில்லா தையல் இயந்திரங்களையும், கூட்டுறவுத் துறையின் சாா்பில் 3 பயனாளிகளுக்கு ரூ.2.90 லட்சம் மதிப்பீட்டில் ஆழ்துளைக் கிணறு அமைக்க கடனுதவியும், மாவட்ட தொழில் மையம் சாா்பில் புதிய தொழில்முனைவோா் மற்றும் தொழில் நிறுவன மேம்பாட்டுத் திட்டத்தின்கீழ் ஒரு பயனாளிக்கு ரூ.63 லட்சம் மானியத்தில் ரூ.2.62 கோடி மதிப்பீட்டில் தொழில் தொடங்குவதற்கான கடனுதவிகளையும் வழங்கினா்.

இந்தக் கூட்டத்தில், மேலாண்மை இயக்குநா் (தமிழ்நாடு பிற்படுத்தப்பட்டோா் பொருளாதார மேம்பாட்டுக் கழகம்) டி.என்.வெங்கடேஷ், மாவட்ட ஆட்சியா் தா.கிறிஸ்துராஜ், திருப்பூா் தெற்கு சட்டப் பேரவை உறுப்பினா் க.செல்வராஜ், மேயா் என்.தினேஷ்குமாா், கூடுதல் பதிவாளா் (கோவை மாவட்ட மத்திய கூட்டுறவு வங்கி) ராமகிருஷ்ணன், மேலாளா் (தமிழ்நாடு பிற்படுத்தப்பட்டோா் பொருளாதார மேம்பாட்டுக்கழகம்) லதா, இணைப் பதிவாளா் (கூட்டுறவு சங்கங்கள்) சொ.சீனிவாசன், திட்ட இயக்குநா் (மகளிா் திட்டம்) சாம் சாந்தகுமாா், மாவட்ட பிற்படுத்தப்பட்டோா் நல அலுவலா் செல்வி உள்ளிட்ட பலா் கலந்து கொண்டனா்.