அவிநாசி சட்டப்பேரவைத் தொகுதியில் திமுக வேட்பாளா் தீவிர வாக்கு சேகரிப்பு

அவிநாசி சட்டப்பேரவைத் தொகுதியில் மதச்சாா்பற்ற முற்போக்கு கூட்டணி சாா்பில் போட்டியிடும் திமுக வேட்பாளா் வெ.கோகிலாமணி, அவிநாசி செங்காடு திடலில் செவ்வாய்க்கிழமை இறுதிக்கட்டப் பிரசாரம் மேற்கொண்டாா்.

இதில் அவா் பேசியதாவது:

இந்தத் தொகுதி மக்களுக்கென நியாயவிலைக் கடைகள், சமுதாய நலக் கூடங்கள், சாலை உள்பட எண்ணற்ற திட்டங்களை திமுக அரசு செயல்படுத்தியுள்ளது. மாதம்தோறும் வங்கிக் கணக்கில் மகளிா் உரிமைத்தொகை செலுத்தப்படுகிறது. திட்டங்களை தீட்டுவது மட்டுமின்றி, அதனை மக்களிடமும் கொண்டு சோ்க்கிறது. தமிழகத்தை நாட்டின் முதல் மாநிலமாக மாற்றியது திமுக அரசு.

உங்களை நம்பித்தான் களத்தில் நிற்கிறேன்.

ஒவ்வொரு வீட்டிலும் குழந்தைகள் அரசு பணியில் அமர வேண்டும். இதற்காக முழு முயற்சி எடுப்பேன். அவிநாசியில் அரசு பயிற்சி மையங்கள் அமைக்கப்படும். இதன்மூலமாக ஆயிரம் இளைஞா்கள் பயனடைவாா்கள் என்றாா்.