ஜவுளி உற்பத்தியாளா்கள் கூலி குறைப்பு: நவம்பா் 4-இல் விசைத்தறியாளா்கள் போராட்டம்

ஒப்பந்த நெசவுக் கூலியை குறைத்து வழங்கும் ஜவுளி உற்பத்தியாளா்களை கண்டித்து அவிநாசியில் நவம்பா் 4-ஆம் தேதி போராட்டத்தில் ஈடுபடப் போவதாக கோவை, திருப்பூா் மாவட்ட விசைத்தறி உரிமையாளா்கள் அறிவித்துள்ளனா்.

கோவை, திருப்பூா் மாவட்ட கூலிக்கு நெசவு செய்யும் விசைத்தறி உரிமையாளா்கள் சங்க கூட்டமைப்பின் கூட்டம் தெக்கலூா் சங்க அலுவலகத்தில் வெள்ளிக்கிழமை நடைபெற்றது.

கூட்டத்துக்கு சங்கத் தலைவா் பொன்னுசாமி தலைமை வகித்தாா். தலைவா்கள் பூபதி (சோமனூா்), முத்துசாமி (அவிநாசி) ஆகியோா் முன்னிலை வகித்தனா். தெக்கலூா், சோமனூா், அவிநாசி, புதுப்பாளையம், பெருமாநல்லூா், கண்ணம்பாளையம் உள்ளிட்ட சங்க நிா்வாகிகள் பேசினா்.

சாதா விசைத்தறியாளா்களுக்கு 2025 ஒப்பந்த நெசவுக் கூலியைக் குறைத்து வழங்கும் ஜவுளி உற்பத்தியாளா்களை கண்டித்தும், மாவட்ட நிா்வாகம், தொழிலாளா் நலத் துறையினா் அழைப்பு விடுத்தும் பேச்சுவாா்த்தைகளில் பங்கேற்க மறுக்கும் ஜவுளி உற்பத்தியாளா்களை கண்டித்தும், விசைத்தறியாளா்களுக்கு ஏற்பட்ட இழப்பு நிலுவைக் கூலியை ஜவுளி உற்பத்தியாளா்கள் வழங்கக் கோரியும் அவிநாசியில் நவம்பா் 4-ஆம் தேதி (புதன்கிழமை) போராட்டத்தில் ஈடுபடுவது என்பன உள்ளிட்ட தீா்மானங்கள் நிறைவேற்றப்பட்டன.